DILI, 18 abríl 2023 (TATOLI)—Prezidente Repúblika (PR), José Ramos Horta, hateten nia parte sei sai observadór neutru hodi akompaña prosesu kampaña eleitorál ba eleisaun parlamentár ne’ebé sei hahú iha loron 19 abríl 2023.
“Ohin, ha’u iha ne’e fahe de’it liafuan oan ruma kona-ba eventu ne’ebé hahú aban, ita hahú formalmente kampaña eleitorál ba eleisaun parlamentár 2023. Ha’u iha de’it liafuan ida ka rua, hatete Prezidente Repúblika sei hanesan observadór neutru, atentu, vijilante,” PR Horta hato’o nia mensajen Estadu ba jornalista sira iha Palásiu Prezidensiál Nicolau LObato, Bairru Pite, tersa ne’e.
Prezidente Repúblika sei akompaña permanente iha teritóriu nasionál dezenvolvimentu atividade kampaña eleitorál.
“Ha’u sei simu informasaun ne’ebé permanente no atualizadu. Ha’u iha konfiansa primeiru iha lidér partidu sira hotu-hotu ne’ebé konkorre ba eleisaun potensialmente bele ukun rai ida-ne’e, sira mak hatene tenke hatudu ba eleitoradu tomak, ba komunidade internasionál sira-nia preparasaun para Governa rai ne’e, governa liuhosi Parlamentu Nasionál nó potensiál liuhosi Governu,” nia dehan.
Xefe Estadu tau konfiansa kompletu ba forsa armada no PNTL hodi garante orden públiku, no mós tau konfiansa ba instituisaun responsável eleisaun hanesan STAE no CNE, no hatene servidór Estadu hotu iha funsaun ne’ebé de’it sira hatene sira-nia obrigasaun morál, legál atu respeita votu sagradu kada eleitór nian.
“Ha’u fiar lidér partidáriu sira sei fahe ho eleitoradu sira-nia programa atu ezekuta bainhira ba iha Parlamentu no karik ba iha Governu saida mak sira halo iha tinan lima mai ne’e para haklean dame iha rai ne’e no hadia povu nia moris”Nia hateten.
Nune’e Xefe Estadu fiar lidér sira sériu tanba lidér sira sei la halo promesa falsu maibé sira halo promesa sira ida-idak hatene bele ezekuta duni tuir kondisaun rai ida-ne’e nian.
“Ne’e mak eleitoradu iha direitu atu ezije partidu polítiku sira no lidér nasionál hakarak rona programa, tanba partidu sira-ne’ebé manán atu forma Governu aktu primeiru sira halo aprezenta programa ba Parlamentu,” nia dehan.
Horta fiar katak iha prosesu kampaña eleitorál ne’e aprezenta programa no fiar mós partidu polítiku evita halo diskursu labele ataka pesoál tanba bele insentivu violénsia.
“Prezidente Repúblika sei rejista diskursu sira-ne’e hotu ka aktu sira-ne’e hotu sei kanaliza ba Prokuadória Jerál Repúblika no aktu sira-ne’e. Se momentu ruma to’o, tenke lidér ka partidu sira-ne’e sei aprezenta an ba Prezidente Repúblika atu Governa rai ida-ne’e buat hotu sei tetu no sukat. Buat ne’ebé ita ko’alia determina kompeténsia governante ida,” nia hateten.
Ne’eduni, iha situasaun ida-ne’e atu povu ba urna hili Parlamentu foun no liuhosi PN Governu foun ba tinan lima mai, hodi halo buat hotu hakle’an dame, labele husik hela kanek no ba oin fasilita diálogu inter-partidáriu entre polítiku no lidér sira hodi hetan Governu ida forte lori dezenvolvimentu nasaun ba oin liután.
Jornalista : Nelson de Sousa
Editór : Cancio Ximenes
