DILI, 18 abríl 2023 (TATOLI)—Ministru Administrasaun Estatál (MAE), Miguel Pereira de Carvalho, hateten, semitériu Metinaro ne’ebé Governu prepara hodi substitui semitériu Becusse ne’e preparadu ona atu haloot mate-isin.
“Iha Metinaro ne’e, iha ona fatin atu hakohi mate-isin no administrasaun autoridade munisípiu Dili sei halo tan mak halo moru haleu, nune’e animál labele tama,” Ministru Miguel hateten ba Agência Tatoli, tersa ne’e.
Governante ne’e hatutan, semitériu Metinaro ne’ebá ne’e 100% preparadu ona no bainhira semitériu públiku Because nakonu no laiha ona espasu, mak bele lori mate-isin sira ba hakoi iha semitériu públiku Metinaro.
Semitériu Públiku Metinaro ne’ebé antes ne’e Governu utiliza hodi hakoi ema-ne’ebé mate ho COVID-19 ne’e, iha 2020 Governu liuhosi Ministériu Administrasaun Estatál (MAE) planea ona atu utiliza semitériu foun iha Metinaro ne’e sai hanesan semitériu públiku ida hodi troka semitériu públiku Becuse ne’ebé atu nakonu ona ne’e.
Orsamentu operasionál ba konstrui semitériu públiku Metinaro ne’e, Autoridade Munisipiu Dili (MD) prevee kuaze rihun $20 hodi fasilita IGEADE, I.P nia servisu iha terrenu.
Jornalista : Osória Marques
Editór : Cancio Ximenes
