Veteranu Covalima rejista kandidatu estudante na’in-177 sei asesu bolsa estudu
COVALIMA, 18 abríl 2023 (TATOLI)–Tékniku Konsellu Veteranu Munisípiu Covalima rejista ona veteranu no martir nia oan sira-ne’ebé submete ona sira-nia dokumentu, atu asesu bolsa estudu hamutuk na’in-177.
“Konsellu veteranu Munisípiu Covalima durante ita halo atendimentu veteranu no martir nia oan ne’ebé submete sira-nia dokumentu atu asesu bolsa estudu ba periódu 2023 ne’e, kandidatu hamutuk na’in-177,” Prezidente Konsellu Veteranu, Osório Soares “Mausoku”, hateten ba Agência Tatoli iha nia kna’ar fatin, Tabakolot, tersa ne’e.
Kandidatu Estudante ne’ebé submete sira-nia dokumentu atu asesu bolsa estudu ba primeiru síklu ensinu Báziku, bolsa estudu segundu no terseiru síklu ensinu báziku, bolsa estudu ensinu sekundáriu, bolsa estudu Ensinu Superiór Universitáriu Timor-Leste no bolsa estudu Ensinu superiór ba rai-li’ur.
Maske durante halo rejistratasaun konsellu veteranu hato’o informasaun to’o ona ba iha postu administrative sira, maibé Konsellu Veteranu Covalima rejista de’it kandidatu atu asesu bolsa estudu hamutuk na’in-177.
Konsellu Veteranu rejista ona kandidatu estudante na’in-177 ne’ebé atu asesu bolsa Estadu, maibé iha nasionál sei halo verifikasaun hafoin sei taka sai rezultadu hosi verefikasaun.
Kritériu atu asesu bolsa estudu submete dokumentu sira hanesan formulariu rekerimentu bolsa estudu, Kartaun Eleitorál hosi kandidatu, Billete identidade hosi kandidatu, Sertidaun RDTL ka batizmu hosi kandidatu orijinál.
Dokumentu seluk mak dokumentu sne’ebé komprova kandidatu matríkula eskola ba tinan 2023, dokumentu komprova aproveitamentu eskolár hosi kandidatu iha tinan 2022, ho rezultadu eskolár ida-idak, mídia finál kaderneta eskolár no konta bankaria hosi kandidatu sira.
Ekipa Tékniku hahú halo rejistrasaun ba kandidatu estudante asesu bolsa iha loron 28 fulan-fevreiru to’o 14 marsu tinan 2023.
Ministériu Asuntu Kombatente libertasaun Nasionál atribui bolsa estudu ba veteranu no martir nia oan sira bazea ba dekretu-lei númeru 8/2009, 15 janeiru.
Tuir dadus, kandidatu Estudante ne’ebé submete sira-nia dokumentu atu asesu bolsa estudu ba primeiru síklu ensinu Báziku, bolsa estudu segundu no terseiru síklu ensinu báziku hamutuk na’in-28 no hosi númeru ne’e kompostu hosi mane na’in-ualu (8) no feto na’in-20.
Kandidatu estudante asesu bolsa estudu ensinu sekundáriu-40 hosi númeru ne’e mane na’in-ualu (8) no feto 22, bolsa estudu Ensinu Superiór Universitáriu iha rai laran 108, mane-36 no feto 72 no bolsa estudu Ensinu superiór ba rai-liur feto na’in-ida.
Jornalista : Celestina Teles
Editór : Cancio Ximenes
