APHN fó formasaun kuidadu paliativu ba profisionál saúde 52 iha HNGV
DILI, 19 abril 2023 (TATOLI) – Asia Pacific Hospice Palliative Care Network (APHN) fó formasaun kuidadu paliativu (moras grave) ba profisionál saúde na’in 52 durante semana ida iha Hospitál Nasionál Guido Valadares (HNGV).
“Ita-nia parseiru husi Ospitál Sigapura, Austrália, Malásia. Semana ida iha ne’e, sira fó formasaun ba pesoál saúde sira iha HNGV no mós enfermeiru, médiku sira ne’ebé mak ita konvida mai husi ospitál rejionál sira hamutuk 52”, Ministra Saúde Odete Maria Freitas Belo dehan bainhira remata asina Mou ho Asia Pacific Hospice Palliative Care Network (APHN) iha HNGV, ohin.
Nia hateten, aproveita formasaun ne’e, Ministra Saúde uza oportunidade hodi asina kedas nota entendimentu ho sira atu oinsá ba oin apoiu nafatin Timor-Leste iha área saúde nian.
“Aproveita oportunidade ida ne’e bele asina nota entendimentu ho ospitál Asia Pasífika nian ne’ebé mak tau matan ba kazu paliativu sira, entaun ho inisiativa HNGV, ba oin haree fila fali saida mak sira atu apoia ita kona-ba paleativu ka aimoruk ka materiál sira ka, ne’e ita asina ona ne’e sira hatene ona saida mak sira atu apoia ba ita”, nia afirma.
Ho formasaun ne’e , espera katak neneik ka beibeik sira bele muda sira nia hahalok oinsá fó atendimentu ba pasiente sira ho di’ak.
Iha fatin hanesan, Xefe APHN, Armin Haznan, informa Asia Pasific hanesan mahon ida hodi prepara servisu paliativu ba komunidade sira ne’ebé mak iha Asia pasífiku nian.
“Bainhira Timor-Leste implementa ida ne’e, ami nota katak servisu ida ne’e presiza tebes, tanba ne’e ami fó formasaun ba pesoál saúde katak tenke ho pasiénsia atu ita lori servisu paliativu ne’e ba ita-nia pasiente sira”, Armin Haznan relata.
Iha fatin hanesan, Diretór Klíniku HNGV Marcelino Correia, dehan ho formasaun ne’e Ministériu Saúde aproveita kedas asina akordu atu ba oin nafatin fó kapasitasaun ba pesoál saúde sira hodi halo atendimentu ba kuidadu paleativu nian.
“Asina akordu ne’e haree liubá kapasitasaun pesoál saúde sira atu halo atendimentu ba kuidadu paleativu nian tanba dalabarak ita halo transferénsia moras ba rai liur husi moras kankru hodi hetan tratamentu iha ne’eba”, nia subliña.
Nia dehan, médiku sira ba estudu iha rai liur kona-ba tratamentu kankru nian, aumezmu tempu kona-ba kuidadu paliativu ba moras ne’ebé avansadu ka moras króniku ne’ebé liga ho tratamentu longu prazu nian.
Iha nota entendimentu ne’e ho durasaun tinan tolu nia-laran, sira sei mai fó fó formasaun no nafatin atu organiza pesoál saúde sira bele hala’o atendimentu ne’ebé di’ak ba pasiente sira iha teritóriu nasionál.
Jornalista : Felicidade Ximenes
Editór : Zezito Silva
