iklan

EKONOMIA, HEADLINE, MUNISÍPIU, OÉ-CUSSE (RAEOA)

Autoridade sei inaugura projetu SERVE no IADE iha Oé-Cusse

Autoridade sei inaugura projetu SERVE no IADE iha Oé-Cusse

Projetu sentru emprezariál Oé-Cusse atinje ona pursentu 100. Imajen Tatoli/Abílio Elo Nini.

OÉ-CUSSE 19 abríl 2023 (TATOLI) – Projetu sentru emprezariál ba edifísiu Servisu Rejistrasaun no Verifikasaun Emprezariál, Institutu Públiku (SERVE,IP) no edifísiu Institutu Apoiu Dezenvolvimentu Emprezariál (IADE) iha Rejiaun SAdministrativa Espesiál Oé-Cusse Ambeno (RAEOA) sei inaugura iha tempu badak tanba progresu fíziku atinje ona pursentu 100. 

Notísia relevante: Projetu sentru emprezariál RAEOA foin atinje 45%

Diretór Rejionál Infraestrutura, Candido dos Reis Amaral, informa, projetu ne’e konstrui iha tinan 2022, ho objetivu atu akumula prestasaun servisu IADE nian, ho komponente grupu formadór sira sei tulun grupu ekonomia pekena emprezáriu no mikro-empreza-sira, atubele hetan formasaun nune’e mós akomoda prestasaun serbisu ba empreza-sira iha SERVE I.P sukursál Oé-Cusse.

“Ita-nia tékniku hosi DRI hamutuk ho tékniku hosi kompañia nian, identifika saida mak presiza kompleta, tanba agora progresu atinje ona 100%, ha’u hanoin iha tempu badak DRI ho benefisiáriu hosi Sekretáriu Rejionál Komérsiu Indústria halo ajenda ba inaugurasaun hodi entrega ona ba autoridade, no importante liu atu uza ona fatin ne’e ba atendimentu públiku,” Candido Amaral, ko’alia iha Oé-Cusse, kuarta ne’e.

Nia informa, iha servisu kiik balu, hanesan monta AC, instalasaun liña elétrika no monta odamatan sira mak seidauk, kona-bá konstrusaun nia serbisu fíziku kompleta ona hein de’it atu halo inaugurasaun.

Entretantu, konstrusaun ne’e ezekuta hosi empreza Aprilia Unipesoál, Lda, ho valór kontratu $297,488.80, ne’ebé aloka hosi Orsamentu Jerál Estadu (2021) ho durasaun serbisu durante fulan-haat.

Servisu fíziku ne’ebé empreza konstrui mak hanesan, edifísiu ba Servisu Rejistrasaun no Verifikasaun Emprezariál, Institutu Públiku (SERVE,IP) nia medida metru 18×8 no edifísiu ba Institutu Apoiu Dezenvolvimentu Emprezariál (IADE), ho medida metro 34×12, moru haleu, fasilidade post-seguransa ho sanitária inklui tanki bee-moos.

Notísia relevante: RAEOA konstrui sentru emprezaríal

Jornalista   : Abílio Elo Nini

Editór         : Evaristo Soares Martins

iklan
iklan

Leave a Reply

iklan
error: Content is protected !!