DILI, 19 abríl 2023 (TATOLI)–Konsellu Imprensa (CI, sigla portugés) komprimetidu halo aprosimasaun ba Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE, sigla portugés) hodi autoriza jornalista sira bele vota movel iha fatin ne’ebé sira halo kobertura.
“Ita hotu akompaña katak órgaun eleitorál sira hanesan STAE seidauk bele fó oportunidade hanesan bainhira CI halo iha eleisaun liubá, liuliu kona-ba oinsá vota movel, katak bainhira jornalista ida halo kobertura iha fatin ida karik nia bele vota iha fatin ne’ebé nia halo kobertura. Tanba ne’e, liuhosi konferénsia imprensa ida ne’e Konsellu Imprensa husu ba STAE no CNE atu tau atensaun makaa’s liu ba servisu ne’ebé jornalista sira halo liuliu iha prosesu eleitorál,” Konselleiru CI, Expedito Dias Ximenes hateten liuhosi konferénsia imprensa, iha salaun CI, Kintál-boot, kuarta ne’e.
Nia dehan, hahú ohin ba oin CI sei akompaña atividade ne’ebé mídia sira halo no nafatin koordena ho órgaun eleitorál kona-ba preokupasaun sira.
“Ita sei iha tempu fulan ida molok tama ba loron votasaun, iha prosesu nia laran CI nafatin luta maka’as atubele direitu ida ne’ebé mídia na’in sira ejize atu jornalista sira vota iha fatin kobertura, CI sei buka nafatin atubele responde direitu ne’e. Sé observadór nasionál ida bele halo observasaun iha sentru votasaun ida no bele vota tanba sá mak jornalista labele. Ida-ne’e sai hanesan kestaun ne’ebé CI buka atubele nafatin halo advokasia no pedidu maka’as ba STAE no CNE hodi fó resposta pozitivu hodi jornalista bele ezerse direitu votu iha loron eleisaun,” nia akresenta.
Foin lalais, ezekutivu sira halo ona alterasaun dalimak ba lei númeru 6/2006, loron 28 dezembru, kona-ba Lei Eleitorál ba Parlamentu Nasionál.
Projetu ne’e hakarak introdús inovasaun iha lei Eleitorál ba Parlamentu Nasionál, ne’ebé introdús ona iha tinan 2011 iha lei Eleitorál ba Prezidente Repúblika hodi mantein armonizasaun regra sira kona-ba prosesu eleitorál iha órgaun soberanu ne’e.
Notísia relevante : Governu altera lei Eleisaun Parlamentu Nasionál
Inisiativa ne’e, inklui mós ho regra foun kona-ba oráriu funsionamentu sentru votasaun, lisensa ba jornalista iha servisu kobertura jornalístika Eleisaun Parlamentár nian, sira vota iha sentru votasaun ne’ebé besik liu iha sira-nia serbisu fatin, obrigatoriedade eleitór sira hodi identifika-an bazeia ba dokumentu identifikasaun pesoál válidu ka kriasaun figura monitór eleitorál ne’ebé ninia funsaun hanesan ho observadór eleitorál sira.
Norma balun mós hadi’a hodi klarifika katak iha asembleia apuramentu nasionál CNE, deside ho definitivamente kona-ba votu nulu sira no elementu sira ne’ebé tau iha boletin votu inklui inkluzaun númeru orden hosi kada kandidatura rezultadu hosi sorteiu lista kandidatura sira.
Aleinde ne’e, adota inovasaun prinsipál ida hosi eleisaun prezidensiál tinan 2021 hanesan sentru votasaun paralelu sira, maski ho forma foun, nune’e prevee atu instala sentru votasaun paralelu 13 iha Dili, ne’ebé ida-idak asosia ba munisípiu ida no ba Rejiaun Administrativa Espesiál Oé-cusse Ambeno (RAEOA).
Sidadaun eleitór sé de’it ne’ebé inskreve ona iha unidade resenseamentu fora hosi Dili, no ne’ebé la hakarak atu ba vota iha ninia sentru votasaun orijinál rasik, bele inskreve iha sentru votasaun paralelu sira ne’e.
Alterasaun ba lei ne’e aprova ona hosi Parlamentu Nasionál no haruka ona ba Prezidente Repúblika hodi halo promulgasaun maibé Xefe Estadu haruka fila ba Parlamentu Nasionál hodi halo konfirmasaun hodi haruka filafali ba Prezidente Repúblika no to’o agora laiha rezultadu ba kestaun ne’e.
Jornalista : Antónia Gusmão
Editora : Julia Chatarina
