CNE observa labarik barak partisipa kampaña PUDD iha Oé-Cusse
OÉ-CUSSE 19 abríl 2023 (TATOLI) – Ekipa Komisaun Nasionál Eleisaun (CNE, sigla portugés), observa iha kampaña dahuluk hosi partidu Unidade Dezenvolvimentu Demokrátiku (PUDD) iha Lifau, Rejiaun Administrativa Espesiál Oé-Cusse Ambeno (RAEOA), kuarta ne’e, labarik barak mak partisipa iha kampaña.
“Bazea ba kalendáriu nasionál ne’ebé CNE aprova, katak ohin PUDD mak halo abertura primeiru iha Oé-Cusse, tui rami-nia haree katak, kampaña la’o di’ak kumpri oras kampaña no hetan seguransa hosi PNTL, maibé ita nota iha mós prezensa hosi labarik barak,” Diretór CNE Oé-Cusse, Tomás Oqui Meta, informa ba Agência Tatoli, hafoin observa kampaña dahuluk PUDD nian iha Lifau Oé-Cusse, kuarta ne’e.
Notisia relevante: PUDD sei hadi’a sistema edukasaun inklui halakon sistema familiarizmu asesu bolsa estudu
Tuir nia, prezenza labarik iha kampaña dahuluk ne’e, la’os kompeténsia hosi CNE nian, tanba prezensa hosi parte CNE sei rekomenda ba inan-aman, atu oinsá sira-bele evita, tanba labarik partisipa bele fó impaktu ladi’ak ba sira, sekarik iha viajen hetan dezastre ka mosu problema ruma iha fatin kampaña.
Nia dehan, deklarasaun polítika iha palku leten labarik sira labele rona, tanba dalaruma partidu sira ko’alia liafuan provokativu entaun mentalidade labarik, ladi’ak iha futuru.
“Tán ne’e parte CNE konsidera ne’e irreguralidade no sei alista iha relatóriu CNE nian, hodi relata ba superior sira, atu foti desizaun ka deside polítika seluk oinsá evita labarik sira labele partisipa, tanba tuir lei bandu labarik hakbesik ba partidu ida bainhira hala’o hela kampaña,” nia katak.
Nune’e, nu’udar responsável órgaun eleitorál iha Oé-Cusse apela ba inan-aman sira, presiza fó livre ba labarik sira atu goza direitu moris, hodi bele halimar iha uma, no evita atu patisipa iha atividade polítika.
“Ha’u hanoin mensajen ne’ebé ita hato’o ba inan-aman sira katak, presiza tau atensaun, labele partisipa iha kampaña, tanba labarik sira mós iha direitu atu goza sira-nia moris, bele halimar iha uma, no labele lori fali mai partisipa iha kampaña, tau nia efeitu ba labarik nia futuru barak, bele akontese problema iha nia hanoin,” nia fó katak.
Diretór CNE ne’e informa, tuir observasaun CNE nian iha kampaña dahuluk ne’e, partidu PUDD kumpre regra, no iha kampaña aberta ne’e hato’o de’it polítiku no programa priodade partidu nian bainhira kaer ukun.
“Ida-ne’e pozitivu tebes, tanba ohin ita haree barak mak introdús programa ba eleitór sira, ne’ebé ami observa laiha lifaun trata malu, provoka malu, no hatún malu, ida ne’e nia di’ak tanba foku ba programa,” nia katak.
Observasaun hosi Agência Tatoli, katak kampaña nasionál dahuluk hosi partidu PUDD realiza iha Oé-Cusse, hahú hosi tuku 15:00 no remata iha tuku 17:00 lorokraik, no situasuan la’o ho di’ak no kontroladu tanba hetan seguransa másimu hosi Polísia Nasionál Timor-Leste (PNTL), no superviziona hosi CNE no Provedoria Diretu Humanu no Justisa (PDHJ).
Jornalista: Abílio Elo Nini
Editór: Evaristo Soares Martins
