Emprezáriu nasionál apoia tratór boot ba ESTV Kalo-Heda Uatulari
VIQUEQUE, 19 abríl 2023 (TATOLI)–Emprezáriu nasionál Bandidu Kualidade, Marito Gamboa, kuarta ne’e, apoia tratór boot ho marka SNH704 New Holland ba Eskola Sekundáriu Tékniku Vokasionál (ESTV) Kalo-Heda iha postu Uatulari, munisípiu Viqueque.
“Ohin ha’u mai iha ha’u-nia eskola anteriór hodi apoia tratór boot ida ho ninia ekipamentu kompletu hodi fasilita profesór no estudante sira fila rai tanba antes ne’e ha’u mós apreende buat barak iha ne’e. Ho ida-ne’e maka ha’u ho inisiativa distribui ekipamentu ba sira,” Antigu ESTV Kalo-Heda hateten iha resintu eskola, Mau-Selok, suku Matahoi, postu Uatulari, kuarta ne’e.
Marito dehan, apoia ne’ebé nia fó tuir kbiit ne’ebé iha hodi tulun eskola halo atividade agrikutura iha eskola.
“Ha’u espera ho apoia ida-ne’e bele tulun alin estudante sira ne’ebé apreende iha eskola ne’e hodi hakma’an imi-nia serbisu. Tanba uluk ami sei eskola iha ne’e fera rai uza de’it ai suak. Ho ida-ne’e maka ha’u foti dezisaun hosi buat ne’ebé uluk ami hasoru ne’e naton ona iha ami, estudante sira agora labele sente tan buat ne’ebé uluk ami enfrenta,” nia akresenta.
Notísia relevante : ESTV Kalo-Heda Viqueque planu kuda viveru ai-kameli 1.000
Nia dehan, ekipamentu tratór boot mai ho ekipamentu fera rai, kuda batar no kuda hare tanba ne’e tenke uza ho kuidadu no responsabilidade.
Iha fatin hanesan, Diretór ESTV Kalo-Heda, Samuel da Costa da Silva, agradese ba antigu estudante Kalo-Heda ne’ebé ho inisiativa rasik hakarak apoia eskola.
“Ha’u lori profesór no estudante Eskola Kalo-Heda nia naran agradese tebes ba ami-nia oan ne’ebé fó ona ajuda akipamentu. Ikus liu, ami hato’o obrigadu tanba liuhosi apoiu ida-ne’e bele motiva halo serbisu agrikultór,” nia tenik.
Serimónia distribuisaun ne’e hetan partisipasaun hosi autoridade lokál, Komandante Eskuadra Polísia Nasionál Timor-Leste (PNTL) postu Uatulari, inan aman inklui estudante sira.
Jornalista : Vitorino Lopes da Costa
Editora : Julia Chatarina
