DILI, 19 abríl 2023 (TATOLI)—Diretór Fórum Organizasaun Naun Governamentál Timor-Leste (FONGTIL), Valentim da Costa Pinto, husu ba Polísia Nasionál Timor-Leste (PNTL) atu prepara karreta própriu ba simulasaun nune’e labele fó impaktu ba membru sira.
Diretór hato’o kestaun ne’e relasiona ho akontesimentu iha loron 17 abríl, bainhira membru Polísia sira halo simulasaun akontese insidente ida hodi rezulta membru balun kanek.
“Ita hotu akompaña foin lalais, membru PNTL sira halo simulasaun ba preprasaun kampaña Eleisaun Parlamentár 2023 no ikus mai akontese insidente hodi rezulta membru balun kanek. Ha’u hanoin ida-ne’e lisaun ida ba PNTL nune’e iha futuru resiza prepara karreta ketak ba simulasaun hodi labele fó impaktu ba membru sira,” Valentim da Costa Pinto hateten, iha nia knaar fatin Caicoli, tersa (18/04).
Notísia relevante : MI rekoñese veíkulu espesiál ba PNTL uza hodi treinu sei limita
Nia nota katak karreta ne’ebé foin lalais membru Polísia sira uza halo simulasaun la’os karreta ba simulasaun maibé operasionál nian.
‘’Bainhira ita atu halo simulasaun, tenke uza karreta ho kondisaun di’ak no seguru hodi hala’o misaun ho di’ak,” nia akresenta.
Ba kestaun ne’e, Diretór Ezekutivu FONGTIL husu ba PNTL hodi propoin orsamentu.
“Kada tinan Governu prevee orsamentu ba PNTL maibé dalaruma kiik, maibé ha’u hanoin ida-ne’e PNTL tenke oferese proposta atu haree sasán sira ne’e. Situasaun ne’ebé mak hasoru sempre iha mudansa,” nia dehan.
Nune’e, Valentim da Costa konsidera bainhira atu halo mudansa instituisaun seguransa ne’e rasik tenke formula no konvense di’ak ho ukun-na’in.
Jornalista : Arminda Fonseca
Editora : Julia Chatarina
