DILI, 19 abríl 2023 (TATOLI)—Organizasaun Naun Governamentál Timor-Leste (FONGTIL) sei halo diálogu ho Partidu Polítiku (PARPOL) sira liuhosi Sentru Informasaun Eleisaun Parlamentár 2023 ne’ebé estabelese ona hodi ko’alia kona-ba asuntu importante haat hanesan saúde, infraestrututa, edukasaun no agrikultura.
Diretór Ezekutivu FONGTIL, Valentim da Costa Pinto, hateten, sira-nia parte presiza realiza diálogu ho PARPOL sira tanba desde tinan 2015 sira halo atividade hanesan auditoria ne’ebé foku ba setór importante haat.
“Ho ami-nia deskobrimentu sira ne’e, hanoin katak presiza organiza talk show hodi konvida PARPOL sira mai ko’alia iha ami-nia Sentru Informasaun. Ita tenke ko’alia antes nune’e bainhira sira hetan fiar atu ukun, nune’e bele konsidera atu mellora problema sira iha terrenu relasiona ho saúde, infraestrututa, edukasaun no agrikultura,” Valentim da Costa Pinto, informa ba Agência Tatoli iha ninia knaar fatin, Caicoli, tersa (18/04).
Notísia relevante : FONGTIL lansa Sentru Informasaun Eleisaun Parlamentár 2023
Nia dehan, kanál diálogu ne’ebé FONGTIL halo importante tebes tanba atu haree no halo mudansa ba problema sira iha terrenu ne’e liuhosi partidu polítiku.
“Mudansa ne’e maihosi partidu polítiku sira tanba bainhira hetan fiar ukun mak iha autoridade atu halo mudansa iha nível polítika no kestaun tékniku sira. Ita planu ba diálogu ne’e rasik semana oin, ami hahú halo aprosimasaun ho partidu polítiku sira atu konvida mai ami-nia sentru hodi diskute,” nia akresenta.
Diálogu ne’e sei foku mós justisa, klimátika, iguladade jéneru, inklui asuntu defisiente ne’ebé Parlamentu Nasional no Governu ratifika ona.
Jornalista : Arminda Fonseca
Editora : Julia Chatarina
