BAUCAU, 19 abríl 2023 (TATOLI) – Partidu Frente Revolusionária Timor-Leste Independente (FRETILIN) sei hadi’a uluk sistema estadu nune’e loke dalan ba implementasaun programa bainhira povu fó fiar iha eleisaun parlamentár.
Sekretáriu Jerál Partidu FRETILIN, Mari Bin Amude Alkatiri, esplika, FRETILIN tenki loke-aan halo inkluzaun hodi marka diferensa bainhira manán iha eleisaun parlamentár no lori benefísia ba povu tomak nune’e tenke barani dadi’a estadu hanesan institusaun ne’ebé konsidera seidauk implementa ho loloos tuir Konstitusaun Repúblika Demokrátika Timor-Leste (K-RDTL).
“FRETILIN manán timoroan hotu manán, nune’e loron-21 eleisaun povu mak tenke manán. Laiha diskriminasaun hanesan timoroan,” Alkatiri hato’o programa polítiku iha kampaña loron dahuluk iha Cairabela, postu Vemasse, kuarta ne’e.
Nune’e mós FRETILIN tenke hadi’a prosesu governasaun hanesan labele deskrimina no envolve partidu polítiku seluk liuhosi plataforma entendimentu entre partidu Libertasaun Popular (PLP), Kmanek Haburas Unidade Nacional Timor Oan (Khunto) no FRETILIN atu hamutuk hadi’a povu nia moris.
Liuhosi kampaña, FRETILIN sei implementa programa hanesan hadi’a sistema edukasaun, katak halo rekrutamentu ba profesór ho kualidade, dezenvolve kurríkulu no hadi’a infraestrutura.
Hadi’a mós sistema saúde hanesan kria kondisaun ba profisionál saúde sira, iha kondisaun ba povu atu hetan tratamentu moras ho kualidade no dignu no kontinua programa cesta bázika hodi fó insentivu ba agrikultór sira atu hasa’e produsaun.
Nune’e mós dezenvolve sistema bee-moos no saneamentu di’ak ba povu, fó atensaun ba problema sosiál, veteranu no hadi’a infraestrutura iha baze hanesan estrada.
“Ita tenke hadi’a sistema no kria kondisaun atu sistema bele funsiona, ne’e ita sei halo,” Mari esplika ba simpatizante, militante no apoiante sira iha Baucau.
Atu implementa programa hirak-ne’e, fundamentál liu mak FRETILIN hamutuk ho partidu aliadu sira tenke iha governu ne’ebé di’ak, katak gasta osan oituan maibé haluan dezenvolvimentu, jestaun rasionál no iha komandu ida mak primeiru-ministru nu’udar xefe governu.
“Buat-ne’ebé ita atu halo uluk mak kurrije, depois harii, hotu tenke haburas serbisu, ita serbisu di’ak efikásia no efisiente, lalais maibé ho loloos,” Mari Alkatiri argurmenta.
Mari Alkatiri konsidera, durante tinan-20 ukun aan, Timor-Leste gasta orsamentu estadu barak ona maibe seidauk benefisia dereita ba povu nune’e bainhira FRETILIN manán tenke marka diferensa liuliu povu tenkei sente dezenvolvimentu to’o suku, knua no aldeia, labele halerik tanba mukit no kiak, tenke iha kapasidade atu utiliza orsamentu hadi’a povu nia moris.
Líder FRETILIN ne’e apela ba estrutura hotu atu serbisu maka’as tún direita ba kada uma atu fahe informasaun no hala’o edukasaun votante no fahe livru programa nu’udar kontratu sosiál hodi hadi’a, harii, haburas no habelar.
Partisipa iha abertura kampaña partidu FRETILIN nian komposta hosi Prezidente Partidu FRETILIN, Francisco Guterres ‘Lú Olo’, lideransa Troika, Lere Anan Timur no Cornélio Gama ‘L7’ no estrutura nível nasionál no munisípiu ne’ebé partisipa hosi militante munisípiu haat; Manatuto, Lautém, Viqueque no Baucau.
Jornalista : Natalino Belo
Editór : Evaristo Soares Martins
