COVALIMA, 19 abríl 2023 (TATOLI)—Komandante PNTL munisípiu Covalima, Superintendente Polísia Basilio de Jesus, husu ba Komisaun Nasionál Eleisaun (CNE sigla-portugés) no Sekretáriu Tékniku Administrasaun Eleitorál (STAE) kumpre, regra nune’e hodi bele kria hakmatek durante iha eleisaun parlamentár.
“Ha’u sujere ba komisáriu destakadu CNE, nafatin fó karajen ba diretór CNE-STAE ho nia funsionáriu-sira atu nafatin kumpre regra sai hanesan matadalan ba periódu ita-nia eleisaun ida-ne’e. Ita kumpre ona sé mak sai implementadór. Durante periódu kampaña ita hanesan autór dahuluk atu aplika ita bele fó hakmatek ba militante partidu sira,” Superintendente Polísia Basilio de Jesus hato’o liuhosi nia diskursu, iha salaun STAE, Kampung Baru, kuarta ne’e.
Ho nune’e, atu hala’o eleisaun parlamentár Komandu Jerál PNTL mós hasai ona regra 17 bazeia ba lei eleisaun parlamentár hanesan labele kesi bandeira RDTL iha motorizada no karreta nia kotuk, labele uza motorizada ho kanu resin labele taka materiál kampañia iha sinál tranzitu.
Aleinde, nia dehan, labele taka materiál kampaña iha igreja no edifísiu Governu, labele faan tua iha fatim kampaña, labele lanu hodi kondús motorizada no karreta, labele tuir kampaña ho kondisaun lanu, durante periódu kampaña labele estraga atributu partidu sira seluk.
Nune’e mós labele uza linguajen provokativu hodi harahun unidade nasionál, evita mobiliza militante hosi munisípiu ida ba munisípiu seluk, labele dahur tan bainhira kampaña ramata no labele hakilar iha dalan hafoin ramata kampaña, labele uza kontetór hodi tula apoiante hosi partisipa iha kampaña, evita lori labarik kiik ba partisipa kampaña, labele tuur iha kapon karreta leten, motorizada ida labele tula ema na’in-tolu, labele viola regra sinál tránzitu no labele lori sasán kro’at.
Nune’e, komandante PNTL husu ba responsavél partidu polítiku atu respeita regra ne’ebé mak komandu jerál fó sai ona bainhira la kumpre polísia sei atua bazeia ba regra, nune’e PNTL sei la duvida no fó espasu ba militante sira atu kumpre regra.
Konstituisaun RDTL Artigu 147 hateten, Polísia no forsa seguransa sira-ne’ebé ba alinea ba dahuluk ko’alia Polísia sei defende legalidade demokrátiku no garante sidadaun sira-nia seguransa internu maibé sira labele iha partidu polítiku.
Alinea daruak haktuir, Prevensaun kriminál tenke hala’o ho respeitu ba direitu umanu, no alinea ba datoluk hateten Lei mak sei harii rejime ba polísia no mós forsa seguransa seluk.
Jornalista : Celestina Teles
Editór : Cancio Ximenes
