DILI, 19 abríl 2023 (TATOLI) – Prezidente Partidu Os Verdes de Timor António ‘Lela Hunu’ Cruz, husu ba estrutura tomak ba Partidu Os Verdes de Timor-Leste atu labele halo insultu ba partidu Fretilin inklui ba nia lider sira no mós partidu CNRT ne’ebé lideradu hosi Xanana Gusmão.
“Ha’u husu ba lider Os Verdes sira respeita ba Fretilin no hakruk ba Xanana, ita laiha inimigu”, António ‘Lela Hunu’ Cruz, iha nia intervensaun iha abertura kamapaña Partidu os Vedes de Timor, iha kampu Sabraka-Laran Munisipiu Aileu, kuarta ne’e.
Lider Partidu os Verdes de Timor konsidera katak Fretilin mak nudar isiadór istória ba ukun no Xanana nudar kontinuadór ba istória luta libertasaun Timor-Leste nian, ida ne’e istória mak hateten, laiha ema ida muda no labele nega ida ne’e.
“Verdes mak sai mahon ba Fretilin no Xanana Gusmão atu hamaran mata-ben povu-nia, tanba ne’e laiha dalan atu koalia aat”, nia dehan.
Lela Hunu ba estrutura Partidu os Verdes de Timor atu foku ba programa no planu prioridade partidu nian atu povu bele vota ba hodi bele liu bareira ho objetivu atu rezolve kestaun dezempregu iha Tmor-Leste.
Jornalista: Natalino da Costa
Editór : Zezito Silva
