LIQUIÇA, 19 abril 2023 (TATOLI)— Ohin loron Partidu Politiku (Parpol) sira iha Timor-Leste hahu kampaña dahuluk antes Eleisaun Parlamentar (ElPar), maibé tuir orariu husi Komisaun Nasional Eleisaun (CNE -sigla portuges) abertura ba festa demokrasia refere la akontese iha Munisipiu Liquiça.
Diretór CNE Munisipiu Liquiça, Celestiano Xavier informa ba Tatoli, orariu ofisial husi CNE nasional hateten katak kampaña iha Liquiça sei hahu iha loron 21 abril mai ne’e ho prezensa Parpol hanesan Partidu Republikanu (PR) no PST (Partidu Sosialista Timor).
“To’o oras ne’e dadauk, CNE nia preparasaun mak distribui orariu kampaña ba autoridade importante sira hanesan PNTL, Media Lokal, NGO sira, ita fahe ona ba stakeholder sira, nune’e ita bele lao tuir sistematika orariu kampaña nian,” Celestiano Xavier dehan ba Tatoli iha Edifisiu Radio Komunidade Tokodede, kuarta ne’e.
Nia esplika, iha mós preparasaun seluk mak CNE fo ona orientasaun ba nia ofisiál ne’ebé rekruta iha Liquiça hodi atende Sentru Votasaun 85, Estasaun de Votos 106. “Ita haruka ona ofisial sira tenke ba ona iha suku hodi halo monitorizasaun ba orariu kampaña ne’ebé mak fahe ona ba ofisiál sira,” nia dehan.
Atividade seluk mak CNE halo monitorizasaun ba programa edukasaun votantes ne’ebé realiza husi STAE (Sekretariadu Tekniku Administrasaun Eleitoral) inklui fo esplikasaun nune’e informasaun ne’ebe fo bele tranparente no onestu ho objetivu bele reduz votos nulu iha Municipiu Liquiça.
CNE mos husu ba Parpol sira hodi bele lao tuir orariu fixu ne’ebé iha no tenke halo komunikasaun no kordenasaun bainhira iha mudansa nune’e sosiedade no observador sira labele sai vitima ba mudansa kalendariu refere.
“Orariu husi nasional ba ohin laiha, no karik mosu orariu foun ne’e presiza kordena fali ho CNE liu-liu ba sira ne’ebé halo atividade door to door,” nia hateten.
Proses kampaña Elpar iha Munisipiu Liquiça sei partisipa husi observador sira ihanesan Observatorio da Igreja Para Os Assuntos Socials (OIPAS) no Ra’es Hadomi Timor Oan (RHTO).
Tuir dadus eleitor STAE ne’ebe publika iha tinan 2022, Munisipiu Liquiça iha eleitor hamutuk 50.987 ne’ebé kompostu husi Postu Administrativu tolu no suku 23.
Kampaña ne’e sei hahu ohin, 19 abril no sei remata iha loron 18 maio 2023.
Jornalista : Cidalia Fátima
Editorá : Armandina Moniz
