OS Verde de Timor prioritiza edukasaun, inkluzaun sosiál no dezentralizasaun podér lokál

DILI, 19 abríl 2023 (TATOLI) – Prezidente Partidu Os Verdes de Timor António ‘Lela Hunu’ Cruz, hateten bainhira povu fó fiar hodi kaer Governu mak sei prioritiza setór edukasaun, inklusaun sosiál no haforsa polítika dezentralizasaun poder lokál.

“Ita Verdes iha programa prioridade mak aposta ba setór edukasaun, atu forma ema sai kualidade, oinsá ita atu investe iha pre-eskolár. Ita mós fó prioridade ba kestaun reziliénsia, inkusaun sosiál inklui oinsá haforsa polítika dezentralizasaun administrativa”, António ‘Lela Hunu’ Cruz, iha nia intervensaun iha abertura kamapaña Partidu os Vedes de Timor, iha kampu  Sabraka-Laran Munisipiu Aileu, kuarta ne’e.

“Ita haree katak ita-nia oan sira balun to’o iha eskola primaria no eskola bo’ot seidauk hatene le’e tanbá ne’e Verdes iha programa ida oinsá atu investe ba pré-eskolar, nune’e forma ita-nia oan sira ho kualidade”, nia dehan.

Nia hateten, kuandu povu fó ba Os Verdes sei tau importánsia ba hadia sistema Governasaun iha Timor-Leste tanba tinan 20 ona maibé Governu la konsege rezolve kestaun sira ne’e.

Aleinde ne’e, Lela Hunu akresenta kuandu povu fó  fiar iha eleisaun parlamentár tinan ne’e, sei haforsa polítika dezentralizasaun administrativa no poder lokál, tanba durante ne’e ukun aan  poder ne’e sentralizadu.

Prezidente Partidu Os Verdes de Timor mós sei fó prioridade ba vida inkluzaun liuliu fó atensaun ba maluk defisiénsia iha Timor laran, laiha ema ida iha kotuk nasaun ne’e presiza ema hotu nian kotribuisaun.

“Tanba ne’e iha ami-nia lista kandidatura hosi númeru 1 to’o 5 ami fó ba maluk defisiensia sira atu ba tur iha parlamentu hodi bele sai lian ba maluk sira defisiensia iha timor. Tanba ne’e husu ba povu hotu atu vota ba Verdes, só partidu ida ne’e mak dignifika ema ho defisiénsia”, nia konklui.

Jornalista: Natalino da Costa

Editór : Zezito Silva