STAE Manatuto rejistu eleitór kuaze 36.000-resin
MANATUTO, 19 abríl 2023 (TATOLI)—Diretór Sektretariadu Tékniku Administrasaun Eleitorál (STAE), Mariano Natalino Soares da Silva, hateten resensiamentu eleitorál no atualizasaun baze dadus iha munisípiu Manatuto, STAE rejistu eleitór kuaze 36-000-resin.
“Iha tinan ne’e, hosi fulan-janeiru to’o fevereiru, ha’u bele dehan eleitór foun aumenta tan 339. Iha marsu, ita seidauk inklui tanba sei iha faze sinkronizasaun dadus, nune’e iha 21 abríl mak foin fó sai dala ida. Maibé númeru provizóriu eleitór Manatuto 36.000-resin ona,” Mariano hateten ba agência Tatoli liuhosi telefónika, kuarta ne’e.
Nune’e, nia dehan, loron 30 molok tama eleisaun ne’e STAE sei fó tempu ba sidadaun ne’ebé kartaun eleitorál lakon no tohar hodi hakbesik ba edifísiu STAE hodi konfirma, maibé lori ho dokumentu komprovativa sira hanesan billete identidade, sertidaun RDTL no passaporte.
“Ha’u husu ba sidadaun sira-ne’ebé kartaun tohar no lakon iha territóriu munisípiu Manatuto atu hakbesik-an ba STAE Manatuto hodi partisipa ba sengunda via nian, ne’ebé hahú 22 abríl no sei ramata iha 06 maiu hodi truka eleitorál,” nia apela.
Responsavél ne’e hatutan, komparasaun eleitór iha 2023 ne’e aumenta ba 36.000-resin no tinan kotuk iha de’it 35.999.
Hosi númeru ne’e, nia relata postu administrativu Barique iha 4.544, Laclo 5.896, postu Laclubar iha 9.352, Laleia hamutuk 3.075, Postu Manatuto Vila iha 10.568 no Administrativu Soibada iha 2.564.
“Ita-nia eleitór ne’ebé rejistu iha STAE Manatuto iha tinan 2022 hamutuk 35.999 kompostu hosi mane 18.505 no 17.494,” nia relata.
Jornalista : Osória Marques
Editór : Cancio Ximenes
