Taur Matan Ruak orienta estrutura PLP aprezenta de’it programa ba Povu
BAUCAU, 19 abríl 2023 (TATOLI) – Prezidente Partidu Libertasaun Populár (PLP), Taur Matan Ruak, apela ba kuadru estruturu, militante no simpatizante atu labele insulta partidu polítiku seluk durante realizasaun kampaña eleitorál, maibé aprezenta de’it programa ba Povu.
Prezidente PLP, Taur Matan Ruak, agradese ba lideransa estrutura nasionál inklui nível munisípiu, postu, suku to’o aldeia no organizasaun afiliadu tanba badinas halibur malu hodi realiza abertura kampaña eleitorál iha kampu Darsula, suku Gariuai, postu Baucau vila.
“Ita-nia kampaña ida-ne’e la mai atu insulta ema, ita mai atu ko’alia saida mak halo ona no saida mak sei halo iha tinan-lima mai oin,” Prezidente PLP hateten iha Darasula, Gariuai, kuarta ne’e.
Jenerál Taur Matan Ruak sei la prepkupa atu insulta malu no rai odiu durante períodu kampaña, maske adversáriu partidu polítiku mai ho propaganda insulta oinoin.
Nune’e, Taur Matan Ruak apela ba militante, apoiante no simpatizante hotu inklui líder partidu PLP atu labele insulta partidu seluk maibé kontinua aprezenta programa povu.
Durante fulan-ida povu hotu sei halibur malu iha fatin barak hanesan iha suku, aldeia, knua to’o munisípiu atu troka hanoin no fahe informasaun nune’e partidu polítiku hotu hakbiit inklui haforsa aan to’o loron-21 fulan-maiu bele vota ba PLP.
Atuál Primeiru ministru, argumenta, kada tinan-lima estadu konvida povu atu ezerse votu hodi hili reprezentante povu ka hanaran sistema alternánsia katak laiha ema ka partidu ida atu ukun mesak nasaun bainhira lahetan konfiansa hosi povu.
Nune’e, PLP konsidera abertura kampaña partidu polítiku sai fatór determinante tanba to’o loron eleisaun nu’udar loron importante atu determina futuru timor tanba bainhira vota sala sei terus durante tinan-lima.
“Ohin iha fatin ida-ne’e ita hahú loke komísiu PLP nian hodi fó-sai hanoin, programa karik ita liu atu lori Timor ba oin,” Taur Matan Ruak akresenta.
Kampaña refere hahú iha oras 13:00 no remata iha 16:00, ne’ebé partisipa hosi Prezidente PLP, Taur Matan Ruak, estrutura nasionál to’o munisípiu inklui militante hosi postu admistrativu neen iha munisípiu Baucau.
Jornalista : Natalino Belo
Editór : Evaristo Saores Martins
