BAUCAU, 20 abríl 2023 (TATOLI) – Komisaun Nasionál Eleisaun (CNE, sigla portugés) apela ba inan-aman hotu atu labele envolve oan iha kampaña eleitorál.
Diretór CNE munisípiu Baucau, Esmerlado Damião Belo, esplika, bazea ba observasaun iha terrenu ba loron dahuluk labarik kontinua envolve iha kampaña komísiu hosi partidu polítiku sira-ne’ebé hala’o iha munisípiu Baucau iha horisehik, loron-19 fulan-abríl.
“Durante atividade edukasaun sívika CNE sempre hato’o beibeik maibé agora daudaun kampaña labarik kontinua partisipa, tuir loloos labele envolve tanba sei afeta bainhira liafuan sira iha intervensaun la edukativu,” Diretór CNE Baucau informa Agência TATOLI iha Vila Antiga, kinta ne’e.
CNE iha kna’ar halo supervizaun ba atividade kampaña liuliu ligadu ho intervensaun polítika hosi lideransa partidu polítiku sira maibé laiha devér atu bandu direita involvementu labarik iha atividade kampaña komísiu ne’ebé hala’oo hosi partidu polítiku sira.
Esmeraldo Belo, argumenta, importante liu mak partidu polítiku sira labele insulta malu tanba labarik menoridade sira rona direita sei rai metin iha memoria nune’e bele afeta ba iha futuru.
“Bainhira lideransa partidu sira atake malu signifika liafuan la edukativu ne’e katak la kuida moralidade labarik sira-nia,” Esmeraldo Belo akresenta.
Tuir observasaun CNE liuhosi ofisiál superviziona iha terrenu durante loron dahuluk kampaña komísiuu hosi partidu polítiku sira iha munisípiu Baucau la’o ho hakmatek, laiha perturbasaun entre militante sira, maske partidu boot rua hanesan Partidu Libertasaun Populár (PLP) ho Frente Revolusionária Timor-Leste Independente (FRETILIN) realiza iha oras ne’ebé hanesan.
Jornalista : Natalino Belo
Editór : Evaristo Saores Martins
