MANUFAHI, 20 abríl 2023 (TATOLI) – Segundu Vise Sekretáriu Jerál Joséfus Luan, informa tuir kalendáriu ne’ebé aprova hosi Komisaun Nasionál Eleisaun (CNE-sigla portugés) PLPA sei hala’o kampaña ho tipu komísiu iha Postu Administrativu Turiscai Munisípiu Manufahi maibé la konsege realiza tanba fenómenu eklipse solár ne’ebé fó perigu tebes ba ema-nia vida.
“Ohin ami-nia komísiu iha Turiscai ne’e la konsege hala’o tanba fenómena eklipse solar, entaun ami deside la hala’o iha ne’ebá, maibé ami nafatin hato’o ami-nia mensajen ba militante sira katak maske ami la ba halo komísiu iha ne’ebá maibé imi fó nafatin konfiansa mai PLPA atu hasai aileba iha imi nia kabas, espesialmente ba povu ai-leba sira”, Segundu Vise Sekretáriu Jerál dehan ba Agência TATOLI via telefone, ohin.
Nia dehan, PLPA mosu atu hadia povu nia moris liuliu ema kiak sira hotu iha nasaun ne’e tanba Timor-Leste presiza governasaun ida ne’ebé di’ak.
“Ami-nia programa prioridade mak edukasaun mak importante tebes hasae liután kualidade mestre sira nian iha eskola, fó saláriu ho di’ak ba sira, tanba ita-nia nasaun iha ona ema matenek mak bele hasai povu hosi susar no terus”, nia relata.
Nia hatutan, bainhira povu fó konfiansa ba PLPA ba ukun mak sei halo uma ba mestre sira atu konsentra iha fatin ida liuliu iha eskola ne’ebé sira hanorin ba atu hanorin estudante sira ho di’ak liután.
Iha parte saúde, PLPA mós tau importánsia hodi hasae tan kualidade atu ema kiak hotu bele asesu ho di’ak no trata ema hotu hanesan.
“Ita tenke fó saláriu ne’ebé di’ak ba ita nia doutór sira no enfermeiru, halo uma ba sira atu bele hela ho dignu nune’e bele atende povu sira nia moras ho dignu, ida ne’e mak polítika PLPA nian”, nia haklaken.
Nia husu ba militante hotu atu fó votu ba PLPA ho númeru sorteiu 2 atu kaer ukun hodi fó moris di’ak ba povu ai-leba sira.
Tuir PLPA nia haree, Timor-Leste ukun aan to’o ohin loron maibé setór agrikultura mós kontinua la’o hakdasak no Governu nunka tau orsamentu ne’ebé bo’ot ba agrikultura ho nune’e mak PLPA hetan fiar hosi povu sei tau orsamentu ne’ebé bo’ot ba agrikultura hodi dezenvolve nasaun ne’e atu redúz dependénsia hosi rai-liur.
Tuir oráriu ne’ebé iha 21 abril PLPA sei kontinua nia kampaña ho tipu komísiu iha Munisípiu Aileu.
Jornalista: Hortencio Sanchez
Editór : Zezito Silva
