COVALIMA, 20 abríl 2023 (TATOLI)—Reprezentante Pároko Ave Maria Suai, Charles Florindo do Carmo, hateten atu garante pás iha festa demokrasia liu-liu iha atividade kampaña eleitorál to’o iha eleisaun iha 21 maiu ne’e, tenke mai hosi ema-nia fuan laran no hahalok.
“Pás tuir matenek na’in balun dehan pás hahú hosi interior, ne’ebè sai hosi ita-nia fuan ho laran la’ós hosi ita-nia ibun de’it, Presiza ita-nia fuan mòs atu nune’e ita bele responsabiliza ita-nia lia-fuan pás, ita haree agora tama iha festa demokrasia ema ida-ida iha direitu maibé oinsa bele garante pás ho dame liuhosi pás,” Charles Florindo do Carmo hato’o mensajen ne’e, iha salaun STAE Kampung Baru, kuarta ne’e.
Nia dehan, atu kuidadu liafuan pás liuhosi ibun ne’ebè prátika linguajen bainhira hala’o movimentu iha kampaña ba partidu ida-ida atu kuidadu linguajen tenke halo ema satisfeitu entaun ema iha ona pás.
Kuidadu pás liuhosi hahalok oinsá atu espresa hahalok hanesan ema provoka tun halo kedas asaun.
Aleinde kuidadu pás no dame liuhusi hahalok no ibun tenke hadomi pás ho sentidu sidadaun hotu mesak timoroan de’it maske diferensa partidu maibé keta haluha hotu-hotu timoroan.
Tanba ne’e, hakarak ka lakohi atu garante pás iha festa demokrasia iha eleisaun parlamentar la’o ho susesu responsabilidade iha ida-idak nia liman.
Entretantu, iha loron 13 fulan-fevreiru tinan 2023, Prezidente Repúblika, José Ramos Horta, dekreta ona loron eleisaun parlamentár ne’ebé sei monu iha loron 21 fulan-maiu 2023.
Bazea ba oráriu ne’ebè Komisaun Nasionàl Eleisaun (CNE-sigla portugés), hahú ona hala’o kampaña Eleitorál iha loron 19 fulan-abríl ne’ebè sei ramata iha loron 18 fulan-maiu tinan 2023.
Jornalista : Celestina Teles
Editór : Cancio Ximenes
