PLPA prioriza dezenvolvimentu infraestrutura bázika
Ainaro, 19 abril 2023 (TATOLI) – Partidu Liberta Povu Aileba (PLPA) promete bainhira hetan fiar husi povu ba kaer ukun iha períodu 2023-2028, sei hadia kondisaun estrada iha territóriu nasionál hodi fasilita sidadaun sira halo atividade ekonómika, sosiál no kulturál.
Kompromissu ne’e hato’o husi Vise Sekretáriu-Jerál PLPA, João Paulo Adito Pereira, bainhira halo komísiu eleitorál iha postu administrativu Maubisse, munisípiu Ainaro.
“Primeiru ita hakarak ultrapassa lai krize ekonomia ne’ebé mak povu Timor-Leste hasoru ne’e. Segundu, infraestrutura báziku, tanba ita haree dalan sira barak mak aat hotu. Se iha futuru mak povu fó konfiansa, dalan sira ne’ebé mak aat iha territóriu laran tomak ne’e ita iha target tinan rua nia laran, estrada sira ne’ebé mak aat ita sei hadia hotu”, João Paulo Adito Pereira informa ba Ajénsia Tatoli, via telemóvel kuarta-feira ne’e.
Dirijente partidu ne’e destaka importánsia husi hadia kondisaun estrada hodi kontribui ba dezenvolvimentu setór ekonomia, liu-liu iha agrikultura atu nue’e bele aumenta produsaun agríkola hodi fó rendimentu ba família no nasaun.
Vise Sekretáriu-Jerál ne’e garante bainhira manan iha eleisaun legislativa ne’e sei hadia sistema edukasaun hodi kontribui ba produsaun rekursus humanus ida ne’ebe kualidade.
“Bainhira povu Timor-Leste fó konfiansa mai ami, PLPA sei halo mudansa radikál ba iha sistema edukasaun nian, liuliu hadia infraestrutura edukativa, harii biblioteka, laboratóriu ba prátika no hadia kondisaun moris mestra no mestri sira nian”, afirma.
PLPA mós hakarak hadia infraestrutura saúde no hadia kualidade atendimentu ba pasiente sira no adopta sistema jestaun ida ne’ebé apropriada ba akizisaun aimoruk no aparellu saúde nian.
PLPA promete mós sei tau matan ba problema veteranu sira, liuliu atu rezolve imediatamente lista veteranu sira ne’ebé sei pendente no sei fó oportunidade bolsu estudu ba estudante, liuliu ba sira ne’ebé inan-aman laiha kbi’it finanseira.
Jornalista: Afonso do Rosário
Editora: Isaura Lemos d Deus
