STAE Covalima hala’o resensiamentu eleitorál prióridade ba sidadaun kartaun eleitorál lakon
COVALIMA, 20 abríl 2023 (TATOLI)–Diretór Interinu Sekretáriu Tékniku Administrasaun Eleitorál (STAE) Covalima, Claúdio Cardoso, hateten STAE Covalima hala’o resensiamentu eleitorál no baze dadus faze daruak fó prióridade ba sidadaun ne’ebé troka kartaun eleitorál tohar no lakon.
“Ita hala’o hela resensiamentu faze dahuluk, ita ramata ona iha 31 marsu ne’ebé sei kontinua segunda faze iha loron 22 fulan-abríl to’o loron neen (6) maiu ba de’it eleitór ne’ebè kartaun eleitorál lakon no tohar, ne’ebé sei la atende ba eleitór foun sira,” Claúdio Cardoso hateten iha salaun STAE Covalima, Kampung Baru, kuarta ne’e.
Razaun Tékniku hala’o atendimentu resensiamentu eleitorál faze daruak la atende ba sidadaun ne’ebé foun atu hasai kartaun eleitorál maibé atende de’it troka kartaun eleitorál no tohan, tanba agora STAE hala’o preprasaun lista votante seidauk halo mudansa eleitór foun no eleitór hakarak muda hela fatin.
Nune’e, ba eleisaun parlamentár tinan 2023, STAE Covalima estabelese sentru votasaun 100 no estasaun votasaun 120.
Antes ne’e, diretór STAE Munisípiu Covalima, Francisco Gusmão, relata dadus trimestre ba dahuluk hahú fulan-janeiru to’o marsu tinan ne’e, STAE Covalima rejista eleitór foun na’in-942 kompostu hosi feto 506 no mane 436, no eleitór ne’ebé halo atualizadu hamutuk na’in-1,383 kompostu hosi feto 598 no mane 785.
Entertantu, bazeia ba dadus ne’ebé Agência Tatoli asesu hosi STAE no rezultadu resensiamentu eleitorál no atualiza baze dadus iha Covalima iha tinan 2022 ne’e hamutuk 48,830, kompostu hosi mane na’in-24,950 no feto na’in-23,880.
Jornalista : Celestina Teles
Editór : Cancio Ximenes
