MANATUTO, 20 abríl 2023 (TATOLI)—Prezidente Conselho Nacional Resistência Timor (CNRT), Kay Rala Xanana Gusmão, hateten bainhira povu fó konfiansa atu kaer ukun mak nia parte sei esforsu atu hadi’a povu nia moris maibé tenke hadi’a uluk Estadu.
Notísia Relevante: CNRT prioritiza dezenvolvimentu tenke to’o iha área rurál
“Presiza hadi’a Estadu ida-ne’e tanba povu terus no susar ona, nune’e hili CNRT tanba hakarak esforsu hodi hadi’a Estadu ne’ebé riin haat (Estadu, Governu, Parlamentu no Justisa) ne’e. Atu hadi’a Estadu demokrátiku ida-ne’e, nune’e ha’u esforsu atu sai xefe Governu hodi bele hadi’a,” Xanana hateten iha kampañia daruak ne’ebé hala’o iha postu administrativu Laleia, munisípiu Manatuto, kinta ne’e.
Xanana Gusmão hateten, asuntu ida-ne’e mak CNRT esforsu no kontinua luta hodi hadi’a fallansu hirak ne’e.
“Ita tenke salva ita-nia Estadu mak tenke lori CNRT nune’e bele moris di’ak no fraternidade,” nia dehan.
Prezidente partidu CNRT ne’ehateten, povu no rai ida-ne’e presiza dezenvolvimentu hosi nasionál mai to’o baze maibé ida-ne’e depois lai, maibé importante mak salva Estadu de direito democrático ida-ne’e.
“Ita-nia Estadu besik atu monu, nune’e presiza hadi’a. Ha’u la’ós hakarak sai Primeiru-Ministru maibé ha’u hakarak hadi’a Estadu no povu ida-ne’e,” Kay Rala Xanana Gusmão hateten.
Jornalista : Osória Marques
Editór : Cancio Ximenes
