Administradór Soibada husu Governu hadi’a estrada
MANATUTO, 21 abríl 2023 (TATOLI)—Administradór Postu Administrativu Soibada, Munisípiu Manatuto, Luis Gonzaga da Silva, hateten liga ba eleisaun parlamentár 2023 ne’e nia parte husu Governu liu-liu Ministériu Administrasaun Estatál (MAE) no Ministériu Planu no Ordenamentu (MPO) atu propoin ba Ministériu Obra Públika atu hadi’a estrada ligasaun hosi ponte Soibada ba Soibada Vila.
“Ami preokupa tebes estrada ne’ebé liga hosi ponte boot mai vila. Ida-ne’e mak problema boot tanba dalan ko’ak barak no bainhira tempu udan ita-nia komunidade liu labele. Husu Governu atu hadi’a no ami bele asesu atu ba sentru votasaun hodi ezerse direitu votu,” Luis Gonzaga hateten ba Agência Tatoli liuhosi telefónika, sesta ne’e.
Administradór ne’e hatutan, kestaun ne’e nia parte subemte ona proposta ba Ministériu Administrasaun Estatál no Ministériu Planu no Ordenamentu nian, maibé to’o daudaun ne’e seidauk iha resposta maske proposta ne’e hatama kle’ur ona.
“Iha ha’u-nia proposta ne’e husu hadi’a estrada kilomtru haat (4) de’it hosi ponte boot too iha Soibada Vila, nune’e komunidade bele asesu tanba provizóriu agora ne’e ami ho haree-kulit la’o dook no rai tahu depois koak tan. Ida-ne’e ami preokupa tebes, tanba ne’e husu parte relevante tau atensaun nune’e ami bele asesu,” nia dehan.
Administradór mós preokupa tebes, tanba iha eleisaun besik ona maibé dalan sai nafatin kestaun no sei prejudika eleitór sira ezerse sira-nia direitu votu hodi bele vota iha eleisaun ne’ebé sei akontese iha 21 maiu 2023.
“Ami rekomenda ba Governu atu book took ka hadi’a ami-nia estrada hosi ponte boot Soibada nian ba Soibada Vila, tanba eleisaun parlamentár mós besik ona, tanba estada ne’e sei difikulta movimentu komunidade ba eleisaun,” nia dehan.
Tuir nia, iha postu administrativu Soibada iha sentru votasaun 10 ho nia suku lima (5) hanesan Leohaat, Samoro, Manufahi, Fatumakerek no Manlala, ho populasaun hamutuk 4.000-resin no xefe família iha 600.
Suku lima asesu ona eletresidade
Entretantu, nia hateten, populasaun iha suku lima ne’ebé pretense ba postu administrativu Soibada ne’e, to’o oras ne’e asesu hotu ona ba eletresidade.
“Ha’u-nia populasaun iha suku lima ne’e asesu hotu ona ba eletresidade. Iha bairru foun balun mak seidauk, maibé ida-ne’e ema tuur halo tiha uma lai ba mak ita organiza no dada fiu eletrisidade ba sira,” nia hateten.
Administradór hatutan, eletresidade ne’e populasaun asesu kompletu foin fulan ne’e, tanba Prezidente EDTL mak iha kuarta (19/04/23) ne’e inaugura eletresidade iha suku Fatumakerek, Samoro no Manufahi nian, no suku ida-ne’e mak ikus liu asesu ba eletresidade entaun populasaun iha postu Soibada asesu hotu ona eletrisidade.
Antes ne’e, Prezidente Eletresidade Timor-Leste, Empreza Públika (EDTL, E.P), Paulo da Silva, husu ba komunidade hotu atu kontinua tau matan ba obra no ajuda halo kontrolu ba obra implementasaun ne’e, hodi dezenvolvimentu iha suku ne’e la’o ho di’ak liután.
Nia hateten suku tolu ne’e, EDTL sei fó gratuita hodi uza eletrisidade ne’e durante fulan-neen, hafoin ne’e EDTL sei monta kontadór prepagu nune’e komunidade suku mós bele kontribui selu eletrisidade, hodi sustenta kombustível tanba jeradór iha sentru eletrika Betano no Hera gasta kombustível barak.
“Husu ba autoridade lokál sira atu hatama proposta ba aldeia sira-ne’ebé mais remota, atu nune’e EDTL hatama iha planu hodi distribui solár panel ba komunidade hirak-ne’e atu sira mós bele hetan naroman eletresidade nian,” nia hateten.
Implementasaun Projetu Eletrifikasaun Nasionál (PEN) pakote 34 iha Tasi-Fatin- Fatumakerek, postu administrativu Soibada, Manatuto ho distánsia liña Media Tensaun (MT) 10,85KMS no liña Baixa Tensaun (BT) 6,5KMS inklui instalasaun transformadór.
Obra refere gasta orsamentu $510,624.00 no benefísia ba uma- kain 200 no obra ne’e implementa hosi Kompaña Rizena Oulale Unipesoál. Lda.
Jornalista : Osória Marques
Editór : Cancio Ximenes
