MANUFAHI, 21 abríl 2023 (TATOLI) – Partidu os Verdes de Timor (PVT) realiza nia kampaña ba loron da-tolu iha Suku Betano Posto Administrativu Same-Vila Munisípiu Manufahi hato’o kompromisu hamutuk neen ba militante no apoiante sira bainhira manán iha eleisaun lejislativa tinan ne’e.
“Imi rona no fahe tutan ita-nia kompromisu hamutuk neen ba ita-nia inan-aman sira no maluk sira hotu, ita hotu servisu makas hodi fó vitória ba ita-nia partidu iha eleisaun ne’e”, Prezidente PVT António Lela Hunu Cruz, iha kampaña aberta ne’ebé hala’o iha Betano, foin lalais ne’e.
Nia dehan, bainhira povu fó konfiansa ba PVT liu barreira iha Parlamentu Nasionál ho kadeira lima ba to’o hitu mak partidu sei utiliza orsamentu subvensaun públika hodi implementa kompromisu ne’ebé fó sai ona iha kampaña eleitorál.
Kompromisu neen ne’ebé PVT kaer metin importante bainhira kaer ukun iha períodu 2023-2028 mak hanesan.
- Harii sentru forsamasun profisionál empregu verde ba verde nia oan hotu.
- Servisu hamutuk ho verde mundiál hodi implementa empregu verde hamutuk 50.000 ba membru família verde hotu.
- Implementa programa hamutuk 1000 kooperativa no empreza verde, hakiak manu, hakiak fahi, hakiak animál sira ba família verde hotu iha Timor laran tomak.
- Sei luta no servisu hamutuk, verde mundiál hodi implementa programa bolsa estudu ba membru verde hotu hamutuk 1000 hodi prepara verde ba tinan 10 no 20 mai oin.
- Harii indústria fini ba manu fini ba fahi, fini ba karau no hahan sira ba animál hodi apoiu verde nia oan sira ne’ebé mak anjampur la eskola hodi hakiak manu, fahi prepara ba futuru oin mai.
- PVT sei instala Embaxadór verde hamutuk 10 hodi trata viza traballu, kontratu traballu ba membru verde hamutuk 50.000 iha nasaun sira hanesan tuir mai.
- Sei servisu ho partidu verde Austrália.
- Sei servisu hamutuk ho partidu verde Nova Zelandia.
- Sei servisu hamutuk ho verde Korea.
- Sei servisu hamutuk ho verde Japau.
- Sei servisu hamutuk ho verde Kanada.
- Sei servisu hamutuk ho verde Inglaterra.
- Sei servisu hamutuk ho verde Irlandia.
- Sei servisu hamutuk ho verde skotlandia.
- Sei servisu hamutuk ho verde Suiz.
Nia hatutan, kompromisu hirak ne’ebé fó sai espesialmente ba família verde hirak ne’ebé lakon tempu mak sei hetan, kompromisu hirak ne’e sei halao bainhira PVT hetan asentu Parlamentu Nasionál utiliza orsamentu subvensaun partidu nian.
“Ita la depende ba Estadu, tanba partidu ida kuandu hetan asentu iha Parlamentu Nasionál osan subvensaun ba kadeira ida kada tinan hamutuk $92.000.00, se ita hetan kadeira hitu no ualu mak sei uza osan ida ne’e hodi implementa programa empregu verde”, Lelahuno dehan.
Nia salienta, PVT atu ba Governu ou la ba ne’e la’os kestaun maibé oinsa atu implementa empregu verde ba joven sira ne’ebé la eskola, laiha futuru no abandonadu hela durante tinan hira nia laran.
Kampaña ho tipu komísiu ne’e hetan seguransa másimu hosi Polísia Nasionál Timor-Leste (PNTL) Manufahi, observa hosi Komisaun Nasionál Eleisaun (CNE-sigla portugés) no Provedoria Direitus Humanus no Justisa (PDHJ).
Tuir oráriu kampaña ne’ebé aprova hosi CNE nasionál loron da-haat PVT sei halo fali nia kampaña politika iha Munisípiu Covalima.
Jornalista: Hortencio Sanchez
Editór : Zezito Silva
