MANUFAHI, 21 abríl 2023 (TATOLI) – Partidu ho númeru sorteiu 5, Kmanek Haburas Unidade Nasionál Timoroan (KHUNTO) kontinua hala’o nia kampaña polítika ba segunda faze iha Munisípiu Manufahi kompromete katak bainhira povu fó konfiansa ba partidu atu kaer ukun sei promove liután relasaun internasionál ho nasaun amigu sira.
“Bainhira povu fó fiar ba KHUNTO ba kaer ukun iha tinan ida ne’e, hahú 2023-2028 mak sei tau prioridade ba páz no estabilidade, promove di’ak liután relasaun internasionál ho nasaun amigu sira iha mundu”, Prezidente KHUNTO Armanda Berta dos Santos, dehan iha kampaña aberta ne’ebé hala’o iha kampu futeból Same Vila, ohin.
Nia hatutan, bainhira KHUNTO kaer Governu hakarak halo Governu ida inkluzaun, envolve ema hotu atu garante sidadaun hotu nia direitu no lakohi atu husik ema ida iha kotuk.
“Iha área defeza nian KHUNTO kaer Governu ou halo koligasaun ho partidu se de’it, mak sei propoen planu estratéjiku ba setór defeza no seguransa ho objetuvu atu garante independénsia nasionál no integridade territoriál hodi prevene ameasa esternu hodi asegura seguransa ba sidadaun hotu ne’ebé moris iha nasaun ida ne’e”, Armanda dehan.
Iha parte seluk, planu dezenvolvimentu kapital umanu KHUNTU mós sei tau prioridade hodi fahe ba parte rua, mak investimentu dezenvolvimentu kapitál umanu ba setór rekursu umanu hodi fasilita bolsu estudu no formasaun setoriál ba foinsa’e sira no investimentu ba kapitál umanu ba prospridade no moris di’ak tanba la merese atu povu moris nafatin iha probreza no presiza halo identifikasaun ba sidadaun hirak ne’ebé moris ho kbiit laek.
Tanba ne’e, nia husu ba militante no simpatizante KHUNTO iha Manufahi atu fó votus maioria ba KHUNTO hodi manán iha eleisaun hodi ukun hamutuk ho partidu se de’it hodi implementa programa prioridade hirak ne’ebé fó sai.
Tuir nia haree, durante tinan lima KHUNTO hamutuk ho partidu jigante sira hanesan Congreço Nasionál Reconstrução Timorense (CNRT-sigla portugés), Frente Revolusionária Timor-Leste Independente (FRETILIN) no Partidu Libertasaun Popular (PLP) maibé dezenvolvimentu ba povu seidauk to’o presiza povu fó fiar tan atu bele aselera dezenvolvimentu iha nasaun ne’e.
“Ha’u la’o haleu ona Timor-Leste laran tomak haree povu barak iha nivél suku no aldeia sei moris mukit, entaun fó fiar mai KHUNTO dezenvolve nasaun ne’e hamutuk ho partidu sira seluk nune’e bele hasai povu hosi mukit”, nia afirma.
Prezidente KHUNTO ne’e realsa tan katak lakoi atu halo promesa barak maibé so husu de’it votus hosi povu tanba promesa hanesan naha todan ida ba nia atu lori bainhira la realiza sei halo terus nafatin povu.
Kampaña ba partidu polítika ne’e halao hetan seguransa masimu hosi Polísia Nasionál Timor-Leste (PNTL) Munisípiu Manufahi, observa direta hosi Komisaun Nasionál Eleisaun (CNE-sigla portugés) no Provedoria Direitus Humanu no Justisa (PDHJ) Manufahi.
Tuir oráriu ne’ebé aprova hosi CNE ba partidu KHUNTO ba terseira faze sei hala’o fali iha Munisípiu Manatuto.
Jornalista: Hortencio Sanchez
Editór : Zezito Silva
