AILEU, 21 abríl 2023 (TATOLI) – Komandante Polísia Nasionál Timor-Leste (PNTL) Munisípiu Aileu, Superintendente Polísia, Ludgerio Picancio Lay, hateten la autoriza partidu polítiku (ParPol) sira mobilza masa hosi munisípiu Díli no husi fatin seluk hodi partisipa kampañaa eleitorál iha Aileu.
“Kuandu hanesan ne’e mak ami hetan ami atua imediata no ami sei haruka fila”, Superintendente Polísia, Ludgerio Picancio Lay, hateten ba Agência TATOLI iha Komandu PNTL Aileu, sesta ne’e.
Nia esplika, atu prevene buat sira ne’e labele akontese mak Komandu PNTL Aileu koloka nia membru ba postu entrada sira hanesan iha área Konsin, área Laclo, área Laulara.
Nune’e mós atu asegura mobilizasaun masa hosi Maubise, Ainaro no Manufahi, PNTL Aileu koloka nia membru Ofisiál Polísia Suku (OPS) iha área Daisoli hodi halo kontrola ba ida ne’e karik partidu balun mobiliza massa ruma hosi fatin sira ne’e mai iha Aileu.
Komandante Ludgerio Picancio Lay, informa durante abertura ba kamapaña Partidu Os Verdes de Timor (PVT) iha Aileu, PNTL la deteta PVT mobiliza apoiante hosi Díli mai tuir kampaña iha Aileu.
“Horbain rua ne’e laiha ida hanesan ne’e, maioria apoiante, simpatizante no militante Partidu Os Verdes nian lori hosi Postu Administrativu haat iha Munisípiu Aileu rasik, sira ne’e mai hosi Dilí ne’e ekipa sira ne’ebé akompaña Prezidente os Verdes de Timor”, Superintendente Polísia, Ludgerio Lay hakotu.
Jornalista: Natalino da Costa
Editór : Zezito Silva
