VIQUEQUE, 21 abríl 2023 (TATOLI)—Polísia Nasionál Timor Leste (PNTL) munisípiu Viqueque observa situasaun kampaña loron datoluk la’o di’ak.
“Ami observa atividade kampaña ba loron ohin nian la’o di’ak. Ida-ne’e maka ami-nia hakarak atu sidadaun sira moris iha hakmatek nian laran durante iha kampaña eleitorál,” Komandante PNTL munisípiu Viqueque, Superentendente Sebastião Alves Quintão, hateten hafoin observa kampaña Partidu Congresso Nacional de Reconstrução de Timor (CNRT), iha eis kampu SMP 2, Beloi, sesta ne’e.
Notísia relevante : Komandu PNTL Viqueque orienta membru asegura seguransa iha kampaña no ElPar
Aleinde ne’e, autoridade seguransa ne’e nota katak Partidu Polítiku sira hala’o atividade hakmatek, nune’e ba oin PNTL sei nafatin fó seguransa másimu durante períodu kampaña eleitorál.
“Ami nu’udar autoridade seguransa sei matein pozisaun atu nune’e buat hotu tenke la’o ho hakmatek. Ohin kampaña partidu CNRT hatudu ezemplu di’ak tanba sira halo kolaborasaun ho parte PNTL,” nia akresenta.
Biban ne’e, nia husu partidu hotu atu kolabora ho PNTL no tenke organiza militante no simpatizante sira hatudu displina nune’e ema hotu bele la’o livre.
PNTL munisípiu Viqueque iha membru efetivu na’in-142 ne’ebé fó seguransa durante períodu kampaña no hetan apoiu seguransa hosi Batalaun Orden Públiku (BOP) inklui FALINTIL-Forsa Defeza Timor-Leste (F-FDTL).
Jornalista : Vitorino Lopes da Costa
Editora : Julia Chatarina
