LIQUIÇA, 21 abril 2023 (TATOLI)— Partido Socialista Timorense (PST) ho numeru sorteiu 15, ohin hahu nia kampaña dahuluk iha Munisipiu Liquiça ho atividade Door to Door no Dialogu Komunitariu iha Suku Leorema, Bazartete, munisípiu Liquiça.
Adjuntu Komisariu Brigada PST Munisipiu Liquiça, Elvis Alves dos Santos informa komunidade, Joven no Militante husi Suku Leorema liu-liu iha Aldeia Hatu-hou kontente tebes ho PST nia prezensa hodi partilla no sosializa informasaun partidu nian.
“Komunidade nia preokupasaun barak, problema hun mak iha partidu barak fo ona votu maibe laiha resposta ba povu nia halerik hanesan estrada, be’e mos no uma (infraestrutura) liuliu ba kafe ne’ebé iha potensia diak maibé folin ladiak,” Elvis Alves dehan ba Tatoli iha Bazartete, sesta ne’e.
Nia esplika, povu matan mos ona durante tinan 20 nia laran kontinua hakilar ba desenvolvimentu no atu hadia ida ne’e PST sei kria subsidiu ba agrikultor sira, hadia estrada, loke sentru formasaun hodi hamosu sistema agrikultor ne’ebé inovativu inklui hasa’e folin kafe.
“PST iha ona nia moto katak firme iha ideologia konsisten iha asaun, se bainhira povu ne’e fo fiar tenke halo duni, no ita labele kolia deit. Ba PST ba kafe ami sei buka dalan kria subsidiu, hasae kafe folin no liga ba agrikultor mekanizadu,” nia hateten.
Elvis Alves dos Santos konkorda tempu ona ba Timor hodi tranforma nia produtu kafe ba modelu oin-oin nune’e bele ona hapara exportasaun kafe sira husi nasaun seluk ho modelu sachet hanesan Nescafe no seluk tan.
Kolia konaba agrikultor, PST mos konsidera desenvolviementu ekonomia presiza mos infrastrutura ne’ebé diak hanesan koneksaun estrada ne’ebé dadaun ne’e inan aman sira iha Leorema kontinua preokupa.
PST rasik mai ho nia planu politika sanolu (10) hanesan tuir mai ne’e:
- Vota ba Repojisaun Orde Demokratika Konstitusional-Defesa Konstituisaun RDTL nu’udar baze ba respeitu Direitu-Sira Sidadadaun Sira Nian
- Vota ba Estadu La Iha Rai
- Vota ba Ras Povu Nian Uma Knua-Nian, Tuir Lisan Timor-Leste
- Vota ba Subsidiu aa Agrikultores- Hari Fundu ba Agrikultores
- Vota ba industrializasaun area Agrikula
- Vota ba asaun ba Trabalhadores/ Saham Untuk Buruh
- Vota ba Ensinu Superior Gratuitu
- Vota ba Protesaun ba Komersiantes Ambulantes/ Kaki Lima no Zonamentu Komersiu iha Dili laran hodi defende Direitus Komersiantes Ki’ik Sira.
- Vota ba Produsan Leis ho Karakteristikas Timor-Leste Nian. Revijaun Quadru Juridiku Nasional
- Vota ba Modelu Ekonomiku no Investmentu Assente iha Partisipasaun Sektor Koperativu Knua – Sektor Publiku – Privada.
Hafoin halo dialogu komunitaria, ekipa PST kontinua realiza atividade door to door ba uma kain kuaze 20 ne’ebé labele konsege partisipa tanba okupadu ho servisu.
Tuir orariu husi Komisaun Nasional Eleisaun (CNE -sigla portuges) Munisipiu Liquiça, aban (22/04) PST sei kontinua halo atividade Door to Door no Dialogu Komunitariu iha Suku Ulmera Bazartete, hafoin iha loron 24 abril sei kontinua iha Suku Vatuvou, Maubara.
Jornalista : Cidalia Fátima
Editorá : Armandina Moniz
