iklan

LAUTÉM, POLÍTIKA

UDT promete sei harii sentru formasaun profesionál iha kada suku

UDT promete sei harii sentru formasaun profesionál iha kada suku

Partidu UDT halo Diálogu Polítiku iha Lospalos (Imagem Tatoli/Camilo de Sousa)

LOSPALOS, 21 abríl 2023 ( TATOLI)- Sekretáriu Jerál Partidu União Democrático Timorense (UDT) Nikson Elvino Madeira, hateten UDT sei harii Sentru formasaun profesionál iha kada suku bainhira UDT hetan konfiansa husi povu iha eleisaun 21 maiu.

Kompromisiu polítiku ne’e hato’o husi, Sekretáriu Jerál Partidu UDT iha kapaña tipu diálogu iha edifísiu UDT Munisípiu Lospalos Vila, PLN, sesta ohin.

Nikson Madeira hatutan katak, harii sentru formasaun ne’e atu bele oferese formasaun téknika iha área oioin ba joven, iha kada suku hodi bele mellora sira-nia kapasidade no skill.

“UDT hakarak halo mundansa ba Sentru Formasaun sira ne’ebé durante ne,e konsentra de’it iha Nasionál, tanba ne,e karik Povu fiar ba UDT iha eleisaun Parlamentár 21 maiu, UDT sei harii Sentru Formasaun ba Joven sira iha baze, hodi fó treinamentu kapasitasaun ba skill oioin atu kontribui ba dezenvolvimentu nasionál no fó moris di’ak ba povu,” Sekretáriu Jerál partidu UDT Nikson Madeira, hateten ba nia militante no simpatizante sira iha fatin refere.

Nia mós afirma ba militante sira katak, UDT nia kompromisiu polítika la’os promesa no retórika de’it maibé sei implementa programa hirak ne,e wainhira povu Lautem tau fiar ba UDT hodi ukun governasaun tuir mai.

Iha fatin hanesan Presidente UDT Francisco David, reforsa katak dezenvolvimentu iha baze tenki involve juventude sira, tanba juventude mak autór ba dezenvolvimentu. Nune’e stabelesementu Sentru Treinamentu iha baze, importante hodi kapasita juventude sira hodi inklina aan ba dezenvolvimentu iha ididak nia Suku.

“UDT sei hadia dezenvolvimentu husi baze liu husi estabelesimentu sentru formasaun no oferese treinamentu ba joven sira, atu sira iha skill hodi bele dezenvolve ididak nia suku iha Munisípiu hotu. Tanba ne’e hili UDT iha loron 21, ho moto Kaibauk ba identidade Timor-Leste rasik,”Afirma Prezidente UDT.

Kampaña UDT iha Munisípiu Lautém hetan observasaun masímu husi Komisaun Nasionál ba Eleisaun (CNE)  no hetan seguransa masímu husi Polísia Nasionál Timor- Leste ( PNTL) munisípiu Lospalos.

Notísia Relevante:https://tatoli.tl/2023/04/19/kestaun-tekniku-kampana-udt-iha-lautem-adia-ba-21-abril/

 

Jornalista : Camilio de Sousa

Editora : Nelia Borges

iklan
iklan

Leave a Reply

iklan
error: Content is protected !!