MANUFAHI, 22 abríl 2023 (TATOLI) – Sekretáriu Jerál Partidu Frente Revolusionária Timor-Leste Independente (FRETILIN) Marí Alkatiri husu ba militante no simpatizante hotu iha Munisipiu Manufahi atu labele nega lider karismátiku Kay Rala Xanana Gusmão nia luta ba funu libertasaun nasionál no dezenvolvimentu.
“Xanana nia luta ita hotu hatene, ita labele nega, ita hadomi nia, bainhira nia fila fali mai FRETILIN tenke hadomi nafatin nia”, Alkatiri anunsia iha kampaña ho tipu komísiu iha kampu futeból Munisípiu Manufahi, sabadu ne’e.
Nia husu ba apoiante sira tenke fó nafatin konfiansa ba FRETILIN hamutuk ho aliadu sira hanesan Partidu Libertasaun Popular (PLP), Kmanek Haburas Unidade Nasionál Timoroan (KHUNTO) hodi hamutuk lori naroman ba povu.
Nia hatutan, bainhira FRETILIN manán iha eleisaun ne’e hamutuk ho aliadu sira iha Plataforma, sei nakloke aan nafatin ba partidu se de’it atu hamutuk ukun nasaun ne’e.
“Bainhira ita manán hamutuk ho plataforma ne’ebé ita asina ona ho aliadu sira, ita sei loke aan nafatin ba partidu seluk atu hamutuk tan ho ita, ita presiza timoroan ne’ebé matenek nia kontribuisaun atu hadia rai ida ne’e, karik partidu seluk lakohi ita keta obriga”, lider fundadór afirma.
Jornalista: Hortencio Sanchez
Editór : Zezito Silva
