CNE identifika karreta Estadu iha atividade kampaña partidu KHUNTO
MANATUTO, 22 abríl 2023 (TATOLI)—Diretór Komisaun Nasionál Eleisaun (CNE) Manatuto, Paulino Soares, hateten CNE identifika karreta Estadu balun iha atividade kampaña partidu KHUNTO nian ne’ebé realzia iha postu administrativu Natarbora maibé ho karta lisensa.
“Iha ne’e, ita haree karreta Estadu no karreta Governu nian maibé ida-ne’e ami simu informasaun katak karreta sira-ne’e hetan lisensa. Ida-ne’e ami CNE foti,” nia hateten ba Agência Tatoli hafoin partisipa kampañia Partidu KHUNTO nian iha Natarbora, sábadu ne’e.
Karreta Estadu ne’ebé hetan lisensa mak hosi Komisaun Nasionál Eleisaun (CNE, sigla portugés) hodi halo supervizaun no Provedória Direitu Umanu no Justisa (PDHJ, sigla protugés) ne’ebé halo observasaun, maibé ba viatura segundu Vise Prezidente Parlamentu Nasionál, Luis Rigoberto nian, ne’e CNE mós hetan ona karta lisensa bele utiliza.
“Ami hetan karta lisensa no bele utiliza no ohin mós loron feriadu ka fim de semana, nune’e bele utiliza hela karreta Estadu hirak ne’e,” nia hateten.
Entretantu, CNE nia monitorizasaun ba kampañia Partidu KHUNTO la’o ho di’ak no laiha liafuan ne’ebé insulta líder partidu polítika seluk ka hato’o liafuan kro’at ruma loiuhosi kampaña refere.
“Ami-nia akompañaamentu dezde hahú to’o ramata ne’e la’o ho di’ak, no laiha liafuan insulta no intimidasaun malu iha kampañia partidu KHUNTO nian iha Natarbora ne’e,” nia hateten.
Aleinde ne’e, nia hateten, iha CNE nia supervizaun iha terrenu nota katak labarik barak mak tabela karreta hodi partisipa iha atividade kampaña eleitorál Partidu KHUNTO nian ne’ebé realzia iha Natarbora.
“Ohin, ami akompaña hosi Laclubar, Cribas mai to’o Natarbora, ami haree labarik menória tabele karreta. Ida-ne’e loloos ne’e kontra, lei eleitorál. Partidu polítika hatene regra no ida-ne’e kontra regra kampañia eleitorál nian. Nune’e, dadus ba envolvimentu labarik nian aiha kampaña ne’e, ami anota hela,” nia dehan.
Jornalista : Osória Marques
Editór : Cancio Ximenes
