MANUFAHI, 22 abríl 2023 (TATOLI) – Partidu ho númeru sorteiu 11 Frente Revolusionáriu Timor-Leste Independente (FRETILIN) liuhosi Sekreáriu Jerál Marí Alkatiri, dehan FRETILIN nia programa importante ida mak atu halo estudu sosiál antropolójika kulturál no ekonómika bainhira hetan konfiansa hosi povu maioria.
“Ita tenke halo estudu sosiál antoropolijia kulturál no ekonómika tanba agora daudaun la’o hela ordenamentu territoriál ne’ebé aprova ona iha Konsellu Ministru, ida ne’e atu deskobre ona rai, ezemplu iha kosta sul serve atu halo saida, iha kosta norte serve atu halo saida, tenke estudu klean atu bele halo buat ruma iha rai sira ne’e nia leten hodi fó benefísiu ba nasaun no povu”, Alkatiri hateten iha kampaña aberta ba loron daruak ne’ebé hala’o iha kampu futeból Munisípiu Manufahi, sabadu ne’e.
Nia hatutan, bainhira deskobre ona kona-ba kualidade rai iha fatin ida-idak mak tenke tau fali importánsia ba be-moos hanesan tenke iha polítika nasionál ba bee.
“Ita ko’alia ba bee, ita tenke iha polítika nasionál bee, atu ita bele hatene loloos saida mak ita halo atu ita-nia rai ne’e iha tempu bailoron labele maran, tenke tau importánsia mós ba infraestrutura atu satan tiha bee ne’e atu labele ba hotu tasi atu bailoron ita bele uza nafatin”, lider fundadór haktuir.
Aleinde ne’e koalia mós kona-ba dezenvolvimentu integradu no sustentável, tenke iha tanba FRETILIN prepara ona planu no programa ne’ebé di’ak atu dezenvolve nasaun ne’e.
Atu implementa programa hirak ne’e, nia husu ba militante hotu iha Manufahi atu fó votu maioria ba FRETILIN atu implementa programa hirak ne’ebé planeia ona.
Kampaña ho tipu komísiu ne’e realiza no hetan seguransa másimu hosi Polísia Nasionál Timor-Leste (PNTL) Munisípiu Manufahi, superviziona direta hosi Komisaun Nasionál Eleisaun (CNE-sigla portugés) no Provedoria Direitu Humanus no Justisa (PDHJ).
Tuir oráriu ne’ebé aprova hosi CNE nasionál, kampaña ba loron da-tolu FRETILIN nian sei hala’o iha Munisípiu Ainaro.
Jornalista: Hortencio Sanchez
Editór : Zezito Silva
