ERMERA, 22 abríl 2023 (TATOLI) – Partidu Demokrátiku (PD) adia kampaña polítika iha Postu administrativu Letefoho, Munsípiu Ermera ho razaun, ekipa la kompletu no estrutura importante barak mak ba partisípa kampaña PD nian iha Maliana, Munisípiu Bobonaro.
Sekretáriu Jerál PD Munisípiu Ermera, Domingos Mariano Reis haktuir katak kampaña PD nian iha Postu Adminsitrativu Letefoho sei adia fali ba loron 16 maiu 2023.
“Ami-nia atividade tabrakan barak, entaun ami fahe ekipa lato’o. Tanba ekipa ida ohin ba Maliana hodi asiste kampaña iha ne’ebá. Entaun ami labele realiza kampaña PD nian iha Letefoho-Ermera. Ami haruka ona karta ba Komisaun Nasionál Eleisaun (CNE) hodi koordena kona-ba adiamentu kampaña refere,” Domingos hatoo ba Tatoli, via telefone, sábadu ne’e.
Nia hateten, maske kampaña iha Letefoho kansela, maibé ekipa PD Minisípiu Ermera kontinua halo atividade ‘Door to Door’ iha Postu administrativu Hatulia A no Atsabe hodi partilla programa no kompromisiu PD nian ba militante no simpatizante sira.
“Em-prinsípiu PD ninia slogan mak ne’e ‘Hakotu Korente Konflitu Hadi’a Povu Nia Moris’. Entaun ita-nia foku mak atu aselera lalais prosesu dezenvolvimentu nasionál,” Domingos esplika.
Nia énfaze katak aselera prosesu dezenvolvimentu nasionál sei foku ba área oioin mak hanesan infraestrutura, agrikultura, edukasaun, defeza no seguransa, koopersaun bilaterál, subsídiu edukasaun, subsídiu ba idozu no subsídiu ba líder komunitáriu sira.
“Em termo infraestrutura, liga ho dezenvolvimentu estrada, ita sei aloka Orsamentu Jerál Estadu (OJE) 75% hodi konstrui estrada rurál, no 25% aloka ba dezenvolvimentu estrada urbana,” Domingus salienta.
Nia dehan katak iha asuntu sosiál nian liga ho númeru dezempregu ne’ebé maka’as. Entaun polítika no planu estratéjia PD nian mak sei loke indústria no fábrika hodi redúz dezempregu iha Timor-Leste no hasa’e númeru empregu. “Programa ida seluk mak hametin kooperasaun bilaterál rejionál no internasionál hodi hetan konfiansa komunidade interasionál. Ida ne’e automatikamente ita sei liga ho ASEAN”.
Sekjer PD munisípiu Ermera haktuir tan katak, PD nia programa ida mak sei hamtein setór defeza no seguransa hodi garante sustentabilidade dezenvolvimentu nasaun nian.
Liga fali ho asistensia sosiál, nia informa katak PD ninia kompromisiu ida mak sei hasa’e subsídiu idozu ba $100.
“Enkuantu, subsídiu mensál ba Xefe Aldeia sei sa’e ba $250 kada fulan ho motorizada ida. Entertantu, subsídiu ba Xefe Suku sei sa’e ba $400, inklui motorizada ida no uma ba lider komunitária. Programa ida ne’e hodi dignifika líder komunitária sira,” nia hato’o.
Setór Agrikultura, Sekretáriu Jerál ne’e hateten PD, sei fornese subsídiu agrikultura no adubus hodi motiva agrikultór sira hasa’e produsaun agrikóla rai-laran. Entaun uma-kain 20 sei hetan hand tractor ida, no fahe mós traktór hodi apoiu komunidade agrikultór iha rai tetuk sira hodi fila rai. Alende ida ne’e, PD mós sei hadi’a no harii irigasaun hodi kanaliza bee ba natar sira iha Timor-Laran tomak.
PD mós sei fó subsídiu ba grupu kafékultór sira hanesan $300 kada fulan to’o tinan tolu hafoin sira-nia kafé fuan mak muda ba grupu seluk.
“Ita mós sei harii viverus iha sentru kada suku hodi bele distribui kafé-oan no ai-oan seluk ba komunidade kafékultór sira,” nia garante.
Ikusliu, PD sei oferese subsídiu sidadania nu’udár asisténsia sosiál ho $200 ba sidadaun hotu kada fin do anu hodi festeza natál no tinan foun.
“Programa espesiál ba estudante sira mak hanesan, sei fó kreditu ba estudante universitáriu hodi fó oportunidade ba sidadaun hotu atu asesu ba ensinu superiór. PD mós sei oferese bolsu méritu ba sidadaun hotu liu-liu komunidade no populasaun ne’ebé mak inan-aman no familía moris ho vida agrikultór,” Domingos konklui.
Jornalista: Filomeno Martins
Editora : Nelia Borges
