Labarik sira partisipa kampaña PD iha Maliana
MALIANA, 22 abríl 2023 (TATOLI)-Kampaña Partidu Demokrátiku (PD) númeru sorteiu (4) ho tipu komísiu aberta iha kampu Futeból Maliana, munisípiu Bobonaro, labarik sira uza atributu PD nia partisipa kampaña polítiku, maske Komisaun Nasionál Eleisaun (CNE, sigla portugés) sensibiliza ona informasaun katak lei bandu envolve labarik minoridade tuir atividade polítika ne’e.
Komsáriu destakadu CNE munisípiu Bobonaro, Domingos Bareto, hateten, situasaun ne’e la’ós foin akontese, maibé akontese mós iha kampána eleisaun sira antes, tanba kampaña nu’udar festa demokrasia iha sosiedade nia leet nune’e labarik sira hakarak mai asiste haree ema barak.
Notísia relevante: PD promete hasa’e saláriu mínimu ba $200 no fasilita kréditu ba joven sira
“Asuntu ida-ne’e pertinente tebes atu hadi’ak, tanba labarik sira-ne’e mai nafatin, uza nafatin atributu, ida mak tuir CNE nia haree katak, sira kuandu rona múzika labarik sira-ne’e mai Deit ona, segundu balu haree inan-aman mai sira mós tuir mai ona, terseiru sira mós simu, uza atributu sira-ne’e hodi mai iha ne’e tuir hotu kampaña, tuir lei labele,” nia informa ba jornalista sira, hafoin superviziona atvidade kampaña refere.
Domingos subliña, asuntu ne’e susar tebes atu muda, maske CNE halo ona edukasaun sívika ne’ebé realiza foin lalais ne molok tama ba kampaña.
“Ita ko’alia mós kona-bá partisipasaun labarik sira-nia, maibé realidade kontinua ita haree labarik sira partisipa nafatin,” nia katak.
Notísia relevante: PD hakarak ukun hamutuk ho partidu hotu-hotu
Maibé CNE nafatin apela ba inan-aman sira katak, labele fó atributu partidu polítiku ba labarik sira tuir kampaña, liu-liu sira-ne’ebé mai hosi dook.
“Tuir CNE nia haree, primeiru ita tenke eleva ka sensibliza ba inan-aman no mós ba labarik sira-ne’e,” nia katak.
Enkuantu iha atividade kampaña ne’e militante balu la kumpre regra tránzitu hanesan la uza kapasete inklui monta kanu-resin hodi movimenta ba mai.
Komandante PNTL Munisípiu Bobonaro, Superintendente Xefe Antoninho Mauluta, haktuir antes ne’e komandu hatún ona orientasaun ba membru sira atu kontrola militante partidu polítiku sira, mantein disipilina no kumpre nafatin regra no dekrettu-lei kódigu estrada.
“Ha’u hanoin ida ne’e ita sei identifika tuir, depois ita sei halo atuasaun kona-bá situasaun ida ne’e, kanu-resin no mós sira-ne’ebé la uza kapasete, depois ita identifika ita halo apreensaun,” nia hateten.
Notísia relevante: PD prioritiza loke zona ekonomia livre iha fronteira
Jornalista: Sérgio da Cruz
Editór: Evaristo Soares Martins
