LIQUIÇA, 22 abril 2023 (TATOLI)— Partidu Movimentu Libertasaun Povu Maubere (MLPM) ho numeru sorteiu 14, ohin loron deside kansela nia kampaña dahuluk iha Postu Administrativu Maubara, Munisipiu Liquiça ho atividade Door to Door no Komisiu.
“Ita sei la realiza Komisiu iha Maubara, ami kansela tiha ona,” Prezidente Partidu MLPM, Reis Kadalak informa direita ba Tatoli via telefonika ba Tatoli, sábadu ne’e.
Reprezentante Relasaun Publika Partidu MLPM, José Martins Boluk informa tuir orariu Komisaun Nasional Eleisaun (CNE -sigla portuges), Partidu MLPM sei hala’o atividade Door to Door no Komisiu iha Postu Administrativu Maubara maibé tanbá iha asuntu tekniku ne’ebé seidauk resolvidu deside hodi adia ba tempu seluk.
“Ohin ita hala’o deit atividade iha Dili no prepara ba aban ba Gleno, iha Maubara ita kansela tanba asuntu tekniku,” José Martins esplika.
Diretór CNE Munisipiu Liquiça, Celestiano Xavier mos konfirma CNE prontu la’o tuir dezisaun husi partidu politiku sira no husu atu nafatin iha kordenasaun no komunikasaun ba malu bainhira iha mudansa orariu.
Celestiano Xavier informa, partidu MLPM sei iha tan oportunidade hodi halo kampaña iha Munisipiu Liquiça tuir orariu CNE nian iha Liquiça Villa iha semana oin, sábadu, 29 abril ho atividade ho atividade hanesan Door to Door no Komisiu.
Jornalista : Cidalia Fátima
Editorá : Armandina Moniz
