ELEISAUN, MUNISÍPIU, VIQUEQUE

PNTL Viqueque buka tuir ema deskoñesidu tuda militante CNRT

PNTL Viqueque buka tuir ema deskoñesidu tuda militante CNRT

Komandante PNTL munisípiu Viqueque, Superentendente Polísia, Sebastião Alves Quintão. Imajen Tatoli/Vitorino Lopes da Costa

VIQUEQUE, 22 abríl 2023 (TATOLI)—Polísia Nasionál Timor-Leste (PNTL) munisípiu Viqueque kontinua buka tuir ema deskoñesidu ne’ebé tuda militante no simpatizante Partidu Congresso Nacional de Reconstrução de Timor (CNRT).

Komadante PNTL munisípiu Viqueque, Superentendente Sebastião Alves Quintão, haktuir, insidente ne’e akontese iha sesta (21/04) kalan maizumenus tuku 19:35 iha área Lohi-Hunu, postu Ossu, munisípiu Viqueque bainhira militante sira fila hosi kampaña CNRT iha eis SMP 2 Viqueque atu ba postu.

“Sesta kalan akontese ema tuda militante hosi partidu CNRT hafoin sira fila hosi kampaña no ami maka akompaña sira. Ema tuda hosi dook kona militante na’in-hitu kanek, maibé kanek kama’an hotu. Ho akontesimentu ne’e ami akompaña sira to’o husik sira iha hela fatin maka ami foin fila,” Superentendente Sebastião Alves hateten ba Agência Tatoli, iha postu Viqueque Villa, sábadu ne’e.

Notísia relevante : CNRT hakarak hadi’a ekonomia rai-laran

Komadante PNTL munsipál informa ema tuda malu iha fatin rua hanesan iha postu Ossu no iha área suku Makadique, postu Uatulari, maibé vitima sira hetan kanek kama’an hotu.

“Akontesimentu ne’e kalan ne’ebé smi la konsege kaptura, maibé ohin ami kontinua ba fatin akontesimentu hodi halo identifikasaun ba suspeitu sira maibé seidauk identifika suspeitu ne’ebé tuda militante sira,” nia konta tuir.

Aleinde ne’e, daudaun PNTL Viqueque kontinua koloka membru sira iha fatin akontesimentu sira, liu-liu iha tempu kalan atu sidadaun sira bele la’o ho livre no seguru.

“Ha’u hakarak husu ba abitante munisípiu Viqueque sira hodi koopera ho PNTL hodi kria pás no estabilidade iha munisípiu ne’e tanba ema hotu hakarak moris hakmatek. Ami kontinua esforsu hodi fó seguransa másimu iha tempu kampaña eleitorál ida-ne’e,” nia tenik.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!