Susar kona família UDT mak kampaña la konsege prosede iha Aileu
DILI, 22 abríl 2023 (TATOLI) – Sekretáriu Jerál Partido União Democrático Timorense (UDT), Nikson Elbio Madeir Lay, hateten UDT kansela nia kampaña eleitorál iha Postu Administrativu Remexiu, Munisipiu Aileu tanba Koordenadór UDT nia oan selebra kazamentu no militante ida mak lakon vida.
“Ami ohin la halo kampaña iha Aileu tanba horikalan ami fila hosi kampaña UDT nian iha Lospalos no to’o iha Díli kalan bo’ot, tanba ne’e ami la konsege ba halo fali kampaña iha Aileu no Kordenadór UDT Munisipiu Aileu nia oan ohin halo kazamentu inklui mós mak ami-nia militante ida mate ohin, tanba ne’e mak militante sira rasik mak husu atu adia ami-nia kampaña iha Aileu ba fali loron seluk, maske nune’e, aban ami sei kontinua ami-nia kampaña iha Betano Manufahi”, Nikson Elbio Madeir Lay, hateten ba TATOLI via telefône, sabadu ne’e.
Nia dehan oráriu adiamentu ba kampaña UDT nian ne’e parte UDT la informa ba orgaun eleitórál CNE, tanba sei submete fila fali de’it ba ajenda kamapaña UDT nian ne’ebé maka iha tiha ona.
Iha biban ne’e mós, sekretáriu jerál destaka importánsia ba pontu mak infraestrtuta governasaun di’ak , edukasaun no saúde.
“Tanba sá mak ami tenke foka ba setór haat sai prioridade iha ami nia programa prioridade, tanba ami haree tinan lima kotuk hanesan obra públika ne’e sai hanesan lamentasaun públika ba ne’ebé de’it sempre kestiona, kuandu UDT povu fó fiar sei hadia setór haat ne’e”, nia dehan
Nia esplika, infrastrutura ne’e sai save ba setór hotu, tanba to’o ohin loron Governu tau prioridade de’it ba estrada nasionál maibé estrada rurál hanesan hosi suku mai postu ne’e difikulta tebes komunidade sira. Difisil ba komunidade sira halo movimentu lori sira-nia produtu mai faan iha villa,
“Governu implementa polítika povu kuda Governu sosa maibé sé bainhira estrada la fasilita kuda se mak sosa produtu sira ne’e estrada de’it”, nia afirma.
Tanba ne’e, UDT kompromete kuandu povu fó fiar ba UDT sei investe iha Ministériu Obras Públika atu tau atensaun ba fasilidade ba jestaun ekipamentu atu bele respode imediata ba situasaun emerjénsia sira, tanba TL sempre hasoru problema inundasaun sira..
“UDT kuandu povu fó fiar sei fó atensaun ba asuntu ne’e oinsá IGE iha munisípiu hodi responde ba risku dezastre naturál sira”, Nikson promete.
Kona-ba setór saude no edukasaun, UDT promete kuandu povu fó fiaar sei hadia infraestrutura adekuandu ba saúde.Tanba ida ne’e mós problema ida ba iha Timor-Leste, presiza iha infraestrurua adekuadu iha eskola no saude atu prodús rekursu adekuadu no mellora servisu atendimentu públiku ne’ebé di’ak ba povu.
Enkuantu kona-ba boa Governansaun, Nicxon Elbio Madeir Lay, hateten UDT kompromete kuandu ka’er ukun karik sei hadia jestaun boa Governasaun liuliu pozisaun sira iha kargu xefia, tanba durante ne’e Funsaun Públika ladún kontrola halo di’ak.
Entrantantu tuir kalendariu ne’ebé aprova hosi CNE iha sabadu (22/4) ohin UDT halo kampaña ho tipu dialogu ho komunidade sira iha postu administrativa Remexio Munisipiu Aileu no kontinua aban domingu (23/4) iha suku Betanu Postu Administrativu Fatuberliu munisipiu Manufahi.
Jornalista: Natalino da Costa
Editór : Zezito Silva
