UNDERTIM promete sei dezenvolve Remexio sai fatin indústria
AILEU, 22 abríl 2023 (TATOLI) – Prezidente Unidade Nasionál Demokrátika da Rezisténsia Timorense (UNDERTIM), Francisco Guteres , hatete kuandu povu fó fiar ba UNDERTIM mak sei dezenvolve Postu Adminitrativu Remexio, Munisípiu Aileu sai fatin ba fábrika produsaun ba bebidas sankis no latarias, atu Timor-Leste labele depende ba importasaun.
“Kuandu povu fó fiar ba UNDERTIM mak ami sei halo modernizasaun ba setór agríkula iha, ami sei halai liu ba dezenolvimentu ortikultura no ami promete kuandu povu fó fiar ba UNDERTIM sei dezenvolve Munisípiu Aileu, Postu Remexio sai fatin ba indústria produsaun bebidas Sankis no latarias”, Francisco Guteres dehan ba TATOLI via telefone, sabadu ne’e.
Nia salienta, programa UNDERTIM nian ida mak alargamentu sidade Dili sai sidade Satelite, hahú hosi Díli ba Metinaro no husi Metinaro to’o Remexio no sei loke mós estrada nasionál hosi Metinaro ba Remexio no Remexio ba Ai-Cruz no hosi Ai-Cruz ba Manatutu.
Aleinde ne’e, UNDERTIM kuandu povu fó fiar mak sei hadia estrada rejionál hosi Remexio ba Lequidoe no Lequidoe ba Aileu atu komunidade bele asesu halo movimentu ba mai.
Prezidente UNDERTIM mós promete kuandu povu fó fiar ba UNDERTIM iha loron 21 maiu 2023 ne’e UNDERTIM mós sei tau prioridade ba polítika dezentralizasaun no poder lokál oinsá fo kbiit ba Governu lokál atu bele dezenvolve munisípiu sira.
Jornalista: Natalino Costa
Editór : Zezito Silva
