ERMERA, MUNISÍPIU, POLÍTIKA

MLPM: “Hadi’a kafekultór nia moris presiza kria indústria kafé”

MLPM: “Hadi’a kafekultór nia moris presiza kria indústria kafé”

Bandeira Partidu MLPM

ERMERA, 23 abríl 2023 (TATOLI) – Partidu Movimentu Populár Libertasaun Maubere (MLPM) promete, karik povu tau fiar hodi kaer ukun sei hadi’a kafekultor sira- nia moris liu husi kria indústria kafé iha munisípiu ne’ebé mak moris ho kafé, liu-liu komunidade kafekultór iha munisípiu Ermera.

Kompromisiu ne’e, hato’o husi ekipa ‘door to door’ MLPM nian, lidera husi Elvis Marçal no Edi de Jesus Martins ba komunidade Lebtu, postu administrative Hatolia A, munsípiu Ermera, domingu ne’e.

“Produtu númeru primeiru ba povu Ermera nia moris mak kafé ne’e. Entaun MLPM hakarak hadi’a ekonómia kafekultór ninian liu husi hasa’e folin kafé. Atu kafé folin sa’e, entaun Indústria kafé ne’e tenke halo iha Ermera. No ema Ermera oan duni mak sai na’in ba indústria refere hanesan halo nescafe, Capucino, no seluktán,” Sekretáriu Jerál MLPM, José Domingos Martins hato’o ba Tatoli via telfone.

Nia haktuir indústria kafé ho ninia objetivu prinspál mak atu halo esportasaun: “Maibé antes ne’e ita iha programa atu oferese uluk subsídiu ba sira, hodi hasa’e uluk produsaun kafé nian. Depois mak ita hasa’e kafé nia folin entre dolar rua no dolar hitu kada kilo.” Nia haktuir.

MPLM mós garantia katak bainhira povu fó fiar, sira sei oferese subsídiu ba joven sira hodi hadi’a sira-nia moris liu husi asesu ba edukasaun.

“Ita sei fó $15 kada estudante primária kada fulan, pre-sekundária $25, sekundária $30 no ba estudante universitáriu sei simu $50 kada fulan. Subsídiu ne’e hodi eleva kualidade edukasaun, inan-aman sira lalika preukupa ona ho sira-nia oan ne’ebé mak fa’an manutolun hanesan agora. Ida ne’e atu suporta labarik sira foku ba eskola de’it,” Martins esplika.

Nia mós reforsa tan katak, MPLM manan sei fó mós kréditu ba joven sira ho funan ne’ebé mak ki’ik hodi hadi’a sira-nia moris.

Entretantu, atividade ‘door to door’ ne’e, hetan partisipasaun husi militante no simpatenzante liu 40 mak partisipa iha aktiviadade kampaña refere.

 

Jornalista: Filomeno Martins

Editora       : Nelia Borges

iklan
iklan

Leave a Reply

iklan
error: Content is protected !!