LIQUIÇA, 23 abril 2023 (TATOLI)— Prezidente Partido Democrático (PD), Mariano Assanami Sabino liu husi komisiu kampaña eleitoral PD iha Munisípiu Liquiça aprezenta planu priorodade partidu nian bainhira hetan oportunidade ukun liu husi Eleisaun Parlamentar (ElPar) tinan 2023.
“Ita lakoi ema atu halo Pasaporte no Billete Identidade (BI) mos dehan Blanku laiha, SIM tenke lalais, lisensa tenke lalais, ida nee mak dehan eletronika, ita hakarak governu ne’ebé efetivu, sai estadu modernu ho padraun standar ne’ebé diak,” Mariano Assanami Sabino iha nia intervensaun liu husi komisiu kampaña eleitoral iha Kampo Futebol Liquiça, domingu ne’e.
Planu Imediata Governasaun 100 dias no Tinan Dahuluk Governasaun husi PD nian mak hanesan tuir mai ne’e:
- Hatun taxa ba ai-han no bebidas asukaradas
- Transforma funsionariu kontratadu sira ba permanente
- Subsidia “reintegrasaun sosial” ba autoridade komunitariu sira (xefe suku no aldeia) sira, ne’ebe mandatu hotu no la re-eleitu.
- Hasa’e subsidiu ferik-katuas sira entre $60.00 to’o $100.00.
- Hadi’a mekanizmu no kria tan espasu fatin tratamentu ba pasaporte, hodi bele atende ema sira buka trata pasaporte ho lais.
- Hatun presu pasaporte 24 oras husi $100.00 ba $50.00, Hatun presu passaporte ida normal 7 dias husi $50.00 ba $30.00.
- Hadi’a mekanizmu no kria tan espasu ba fatin tratamentu Billete Identidade (BI), Passaporte no Sertidaun RDTL sira nian ba 24 oras, halo atendimentu ida lais no evita bicha naruk sira neebe halo ema tenki forma husi tuku 03.00 too oras serbisu nian.
- Tenki estabelese Standard Operational Procedures (SOP) ba atendimentu publiku sira tha ministeriu hotu-hotu.
PD mós kontinua tau prioridades ba areal rural sira hanesan hadi’a estrada sira husi sede Postu Administrativu sira ba iha suku sira no husi suku ba suku seluk. Dada no hadi’a bee-mos iha suku no aldeia sira ne’ebe seidauk iha bee-mos.
Nune’e mós hadi’a no harii sentru saude iha suku laran sira ne’ebe seidauk iha sentru saude, dada eletrisidade ba uma sira ne’ebe seidauk hetan ahi iha suku laran no fó apoiu ba grupu koperativa sira iha suku laran.
“Alende ne’e sei tau matan ba ferik katuas sira ne’ebe moris vulneravel no aumenta sira nia subsidiu, tau matan ba Juventude no desportu sira iha suku laran,” nia esplika.
PD sei kria subsidiu “reintegrasaun sosial” ba xefes suku no xefe aldeia sira, katak bainhira mandatu hotu, xefe suku no xefe aldeia sira iha direitu ba subsidiu reintegrasaun sosial entre $2.000 too 5.000.00.
Hasa’e estatutu Pesoal Apoiu Suku(PAS) husi voluntariu ba funsionariu publiku permanente inklui tau Fundu Dezenvolvimentu Suku (FDS) ba kada tinan montante hamutuk $100,000.00) to’o $200,000.00 hodi bele atende nesesidade urjente.
Jornalista : Cidalia Fátima
Editorá : Armandina Moniz
