LIQUIÇA, 23 abril 2023 (TATOLI)— Partido Democrático (PD) ohin loron hahu kampaña dahuluk iha Munisípiu Liquiça no promete sei muda no desenvolve rikusoin tasi ibun Liquiça nian sai sítiu turístiku ne’ebé bele hatama reseita ba munisípiu.
Kampaña ne’ebé tuir orariu tenke hahu iha tuku rua lorokraik, maibe tenke hahu fali tuku 4 lorokraik tanba udan bo’ot ho anin ne’ebé hafalun Liquiça Villa durante oras rua nia laran.
Simpatizante ho Militante PD nian kontinua nakonu iha Kampu Futebol Liquiça maske tenke haris udan no simu anin malirin iha lorokraik ne’e.
Iha kampaña refere, Prezidente Konsellu Polítika Nasionál (CPN -sigla portuges) Partidu PD, Adriano do Nascimento “Loro Mau” hateten, munisípiu Liquiça iha rikusoin barak poténsia boot ba desenvole setor turistíku maibé dadauk ne’e kontinua abandona.
“Liquiça iha rikusoin barak iha tasi ibun, no tanba sa tasi diak no furak maibe to agora seidauk desenvolve fatin turismu,” Adriano do Nascimento dehan durante kampaña eleitoral iha Munisipiu Liquiça, domingu ne’e.
Loro Mau aumenta, aliende setor turistíku, iha mos rai henek no fatuk ne’ebé seidauk regulariza ho diak, nune’e presiza jestor diak atu halo jestaun no hatam reseita laos deit ba Munisípiu Liquiça maibe ba mos Timor-Leste.
Iha fatin hanesan Sekretariu Jeral PD, António da Conceição “Kalohan” iha nia intervensaun husu ba komunidade tomak iha Liquiça atu dala ida tan fó fiar ba PD hodi kontinua tane mehi husi sira 3 sakrifika a’an ona hodi mate ba rai ida ne’e.
“Hanoin inan aman lakon iha Liquiça iha dia 06 de abril (Masakre Liquiça), ita nafatin tane sira nia mehi. Ita tenke halo jura ba rai ida ne’e katak ita sei la husik Nicolau Lobato nia mehi monu le’et deit, labele husik le’et deit ema balun ne’ebé sakrifika aan ba rai ida ne’e,” Kalohan esplika.
Sekjer PD rekoñese martires sira nia kontribuisaun ba rai ne’e boot los no jerasaun foun tenke hamriik iha sira nia kabaas hodi hateke ba dook, labele hateke deit husi ain tutun, tanba istoria laos partense ba ema ida nian.
Nia fo hanoin hikas ba partisipante sira iha komisiu refere hodi hanoin kedas sentidu de votu ne’ebé fó votu nia folin mak atu halo mudansa lori desenvolvimentu no prosperidade ba rai ida ne’e.
Komisiu PD ne’ebé hala’o iha Munisípiu Liquica lorokraik ne’e hetan mós observasaun husi CNE (Komisaun Nasionál Eleisaun), PDHJ (Provedoria dos Direitos Humanos e Justiça), RENETIL (Resistência Nacional dos Estudantes de Timor-Leste) no hetan seguransa maximu husi PNTL (Polísia Nasionál Timor-Leste).
Tuir orariu husi CNE, PD sei kontinua halo mini kampaña iha Maubara, Liquiça iha loron 10 maiu 2023.
Jornalista : Cidalia Fátima
Editorá : Armandina Moniz
