AINARO, 23 abril 2023 (TATOLI) – Partidu Republikanu (PR) kontinua defende polítika dada kadoras Greater Sunrise mai iha Beaço, munisípiu Vikeke hodi loke postu traballu ba timoroan no diverifika ekonomia nasionál.
“Programa ne’ebé ohin ami ko’alia iha ne’e mak atu apoia nafatin polítika Xanana Gusmão nian oinsá dada kadoras mai iha Beaço. Ida ne’e importante atu kria servisu iha rai laran hodi diversifika ita nia ekonomia”, Adjuntu Sekretáriu-Jerál, Venáncio Sarmento, informa ba ajénsia Tatoli, bainhira halo kampaña ho tipu vizita, fahe brosura no Sticker, iha postu administrativu Hatu-Udo, munisípiu Ainaro, domingu ne’e.
Nia hatete, atu konkretiza mehi ne’e “presija halo negosiasaun ho Governu Austrália kona-ba prosesu dada kadoras ne’e mai Timor-Leste”. Tuir dirijente ne’e, PDN mos hakarak dezenvolve setór pekuária no ortikultura, iha postu administrativu refere.
“Iha ne’e ema hakiak animál barak no mos potensiál ba pekuária no oortikultura hanesan nu’u, kulu, aidila no aifarina. Tanba ne’e, ita sei kria polítika ida oinsá mak insentiva populasaun sira atu lori sira nia produtu ne’e ba merkadu hodi hadia sira nia moris”, nia akresenta.
Venáncio Sarmento realsa tan katak tenki fó prioridade dahuluk ba dezenvolvimentu setór infraestrutura, liuliu estrada atu nune’e populasaun sira bele lori prudutu ba faan hodi hadia rendimentu família.
PR mós hakarak dezenvolve setór turizmu iha postu administrativu Hatu-builico no otelaria iha posto administrativu Maubisse.
Líder polítiku ne’e reforsa tan katak, PR hakarak fasilita komunidade sira atu asesu ba kréditu lahó funan ba setór privadu timoroan atu insentiva investimentu iha setór otelaria no restaurante iha sítiu turístika sira atu nune’e bele fó servisu ba komunidade lokál.
Notísia relevante: PR la konsege realiza kampaña iha Manufahi tanba kestaun téknika
Jornalista: Afonso do Rosário
Editora: Isaura Lemos de Deus
