Top

UDT fó prioridade ba infraestrutura bázika

UDT

MANUFAHI, 23 abríl 2023 (TATOLI) – Sekretáriu Jerál Partidu ho númeru sorteiu 7, União Democratica Timorense (UDT) Nikson Eldio Madeira Lay, hateten UDT sei fó prioridade hodi dezenvolve infraestrutura bázika bainhira povu fó fiar.

“Ami hanesan partidu polítiku iha programa jerál hanesan, saúde, edukasaun, Governasaun di’ak no agrikultura, maibé ami-nia prioridade liu ba infraestrutura bázika, tanba ita haree durante tinan 20 ita ukun aan Governu konsege investe makas ona ba dezenvolvimentu hotu maibé infraestrutura bázika iha área rurál sira seidauk dezenvolve, entaun ami tau importánsia liubá ne’e”, Sekretáriu Jerál dehan ba Agência TATOLI via telefone, domingu ne’e.

Tuir UDT, dezenvolvimentu hosi kapitál munisipiu to’o nasionál komesa di’ak hotu ona liuliu estrada no eletrisidade, maibé iha Suku sira liga ba postu administrativu sira seidauk di’ak.

“Ita haree estrada sira iha kapitál munisípiu sira liga mai nasionál buat hotu la’o di’ak ona, hanesan estrada no eletrisidade, maibé ita haree fali hosi aldeia liga ba suku, suku liga ba postu administrativu sira sei aat hela, ida ne’e mak sai hanesan preokupasaun UDT nian no ami hakarak fó prioridade makas ba iha ne’ebá, bainhira UDT envolve iha Governasaun ida tuir mai sei propoin atu tau orsamentu ho montante boot ba iha ne’ebá atu koree povu hosi susar no terus”, nia dehan.

Nia hateten, bainhira dezenvolve infraestrutura bázika sira di’ak ona mak foin bele hadia povu nia ekonomia moris tanba bele asesu ona ba merkadu.

Iha parte seluk, UDT bainhira envolve iha Governasaun mak sei tau importánsia mós óinsa atu estabelese Institutu Jestaun Ekipamentu iha munisípiu hotu atu bele fó apoiu lalais ba komunidade sira bainhira mosu dezastre naturál balun.

“Estabelese Institutu Jestaun Ekipamentu ne’e importante iha munisípiu hotu tanba ita hatene ona ita-nia klimátiku Timor-Leste ne’e oinsa, dezestre naturál mosu hela de’it, entaun institutu ekipamentu ne’e tenke tau iha munisípiu hotu atu fasilita ita-nia komunidade sira ho lais, ita labele konsentra de’it iha nasionál”, nia afirma.

Aleinde ne’e, UDT mós tau prioridade no defende polítika dezentralizasaun no poder lokál tanba durante ukun aan to’o ohin loron Governasaun troka malu dala hira ona buat hotu sentraliza de’it iha nasionál la fó poder totál ba administradór sira no autoridade lokál sira.

“Autoridade lokál sira mak besik liubá povu, sira mak hatene situasaun povu nian, tenke fó poder ba sira la’os iha nasionál de’it, autoridade lokál sira hatene hela povu nia susar maibé sira la iha kbiit atu responde ba nesesidade povu nian tanba buat hotu sentraliza de’it iha nasionál”, nia relata.

Tanba ne’e, nia husu ba militante no simpatizante sira iha Munisípiu Manufahi atu fó konfiansa ba UDT atu hadia povu nia moris bainhira envolve iha Governasaun.

Tuir oráriu ne’ebé aprova hosi Komisaun Nasionál Eleisaun (CNE-sigla portugés) nasionál depois remata kampaña UDT nian iha Manufahi no iha loron tuir mai sei kontinua kampaña fali iha Munisipiu Covalima.

Jornalista: Hortencio Sanchez

Editór : Zezito Silva

Publisidade

Leave a Reply

Latest Post

error: Content is protected !!