iklan

AILEU, HEADLINE

 Administradór Lequidoe preokupa kondisaun estrada ne’ebé grave tebes

 Administradór Lequidoe preokupa kondisaun estrada ne’ebé grave tebes

Administradór Postu Administrativu Lequidoe, Domingos António. Imajen Tatoli/Natalino Costa

DILI, 24 abríl 2023 (TATOLI) Administradór Postu Administrativu Lequidoe, Munisípiu Aileu, Domingos António preokupa ho kondisaun estrada ne’ebé grave tebes, hodi difikulta movimentasaun populasaun iha fatin ne’ebá.

“Kondisaun estrada iha Postu Administrativu Lequidoe agora dadaun grave tanba hosi dalan bo’ot ne’e ba Suku Namulesu, Manukasa no Manukasa ba Suku Fahisoi dalan ne’e kotu no hosi Suku Mamles ba Suku Gerrileu no hosi Gerrileu ba Suku Asibilito no mós hosi Asibilito ba Faturilau ne’e kotu totál”, Domingos António dehan ba jornalista sira iha Administrasaun Munisípiu Aileu, segunda ne’e.

Nia dehan, problema ne’e sai hanesan preokupasaun sériu ba Administradór Postu Lequidoe, tanba difikulta komunidade sira halo movimentu iha fatin refere.

“Ha’u hanesan Administrador Postu, ha’u orienta xefe suku sira, mobiliza nia-komunidade iha fatin ne’ebá atu hadia estrada ne’e, hodi fasilita sira bele lao, liuliu transporta sira-nia produtu mai iha sidade”, Domingos António haktuir.

Nia husu ba Governu atu halo intervensaun imediata ba kondisaun estrada Postu Administrativu Lequidoe hodi komunidade bele halo fali movimentu.

Administradór Lequidoe ne’e mós preokupa ho komunidade sira iha suku rua hanesan Faturilau aldeia Asibilitu ho totál 884 no Suku Betulau Piloco ho populasau 400-resin ne’ebé seidauk asesu ba eletrisdidade, nune’e mós sei iha problema bee moos, tanba komunidade sira sei konsumu udan-been.

“Hanesan xefe postu husu ba Governu atu rezolve kestaun ne’e, nune’e iha ukun aan ida ne’e ema hotu bele sente no goza, kuandu populasaun moris di’ak dezenvolvimentu aseleradu”, Domingos António salienta.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!