CNE identifika labarik partisipa atividade kampaña iha Covalima
COVALIMA, 24 abríl 2023 (TATOLI—Diretór Komisaun Nasionál Eleisaun (CNE-Sigla-portugés) Covalima, Hermenegildo de Sena, hateten atividade kampaña eleitorál hosi partidu politíka sira-ne’ebé realiza iha Covalima ne’e, CNE identifika labarik barak mak partisipa iha atividade kampaña maske lei bandu.
“Durante partidu polítiku sira hala’o kampaña eleitorál iha munisípiu Covalima, ami identifika labarik sira partisipa iha kampaña eleitorál hosi partidu Os Verdes de Timor no partidu FRETILIN nian,” Hermenegildo de Sena hateten ba Agência Tatoli iha nia kna’ar fatin, Kampung Baru, segunda ne’e.
CNE identifika labarik partisipa iha kampaña eleitorál hanesan, partidu Os Verdes de Timor ne’ebé hala’o kampaña eleitorál iha kampu eis prizaun Suai Loro, iha loron 22 fulan-abríl tinan 2023 ne’ebé labarik sira bidu hodi simu prezidente partidu polítika.
Aleinde partidu Os Verdes de Timor, CNE mós identifika labarik ne’ebé partisipa kampaña eleitorál ho tipu komísiu partidu FRETILIN iha kampu Ladi-Covalima.
Bazeia ba kalendáriu, partidu polítiku sira hahú hala’o kampañia eleitorál hahú iha loron 19 ne’ebé partidu Asosiacão Populár Monarquia Timorense (APMT) mós laiha atividade hodi hala’o kampaña eleitorál ho tipu diálogu, door-to-door mós la hala’o.
Nune’e, iha loron 21 Partidu Dezenvolvimentu Nasionál (PDN) mak hala’o kampaña eleitorál iha postu administrativu Maucatar, munisípiu Covalima, iha loron 22 fulan-abríl Partidu Repúblikanu mós la hala’o atividade.
Iha loron 22 fulan-abríl, Partidu Os Verdes de Timor mak hala’o kampaña iha kampu eis prizaun Suai Loro ne’ebé CNE indentifika labarik sira mós partisipa iha atividade partidu.
Iha loron 23 fulan-abríl, partidu FREILIN mós hala’o kampaña ho tipu komísiu ne’ebé labarik sira mós partisipa iha kampaña eleitorál.
Durante partidu polítiku sira hala’o kampaña eleitorál iha munisípiu Covalima, CNE identifika labarik sira partisipa iha kampaña eleitorál, maibé la identifika militante sira uza karreta no motorizada Estadu partisipa kampaña.
Jornalista : Celestina Teles
Editór : Cancio Ximenes
