CNE Manatuto hala’o edukasaun sívika fó prioridade ba GAM-Parpol-EhD
MANATUTO, 24 abríl (TATOLI)—Diretór Komisaun Nasionál Eleisaun (CNE), Paulino Soares, hateten CNE hala’o edukasaun sívika iha Manatuto ne’e fó prioridade liu ba partidu polítika (Parpol), membru grupu arte marsiál (GAM) inklui Ema ho Defisiénsia (EhD).
“Kona-ba edukasaun sívika, ami CNE Manatuto hala’o durante fulan rua ba dala neen ona, ne’ebé hahú iha marsu to’o abríl tinan ne’e. Nune’e ami hahú iha 27 marsu iha postu Barique, suku Barique no alvu ne’e ba komunidade. Iha 28 marsu iha suku Manehaat mós ho nia alvu ba komunidade. Iha 29 marsu ami hala’o iha Natarbora vila, ami-nia alvu mak partidu polítika, arte marsiál no arte rituál inklui ema ho defisiénsia sira,” Paulino Soares hateten ba Tatoli iha nia knaar fatin, segunda ne’e.
Iha 11 abríl, nia dehan, CNE kontinua ba iha postu Soibada vila hodi hala’o edukasaun sívika ba partidu polítika, arte marsiál no arte rituál inklui joven sira, no iha 12 abríl ba grupu pastorál sira no mós partidu polítika, arte marsiál no arte rituál.
Edukasaun sívika ikus liu ne’e, nia hateten, taka iha postu Laclo iha suku ida-ne’ebé dook hosi vila entre munisípiu Aileu nian, maibé ida-ne’e para CNE sei kontinua fali depois kampaia hotu mak kontinua fali.
Iha prosesu edukasaun sívika ne’e, nia dehan, komunidade husu atu kontinua programa liu-liu matéria kona-ba krime eleitorál ne’e no iha membru arte marsiál sira mós rekomenda ba CNE katak buat ida akontese bainhira eleisaun ne’e labele duun mak arte marsiál.
“Iha edukasaun sívika ne’e ami fó kona-ba sistema eleitorál, kampaña eleitorál, matéria partidu polítika nian no krime eleitorál,” nia hateten.
Iha edukasaun sívika ne’e, CNE Manatuto halo preparasaun dahuluk mak rekruta ofisiál eleitorál estasaun votasaun hamutuk 98, depois halo suervizaun ba prosesu baze dadus eleitór sira-nian, no ida-ne’e liu tiha ona no seluk mak edukasaun sívika ne’e mós konklui ona to’o ikus mak prepara ba kampaña eleitorál to’o eleisaun.
Jornalista : Osória Marques
Editór : Cancio Ximenes
