iklan

MANATUTO

CNE Manatuto preokupa partidu MLPM kansela kampaña la fó koñesimentu

CNE Manatuto preokupa partidu MLPM kansela kampaña la fó koñesimentu

Diretór CNE Manatuto, Paulino Soares. Imajen Tatoli/Osória Marques

MANATUTO, 24 abríl 2023 (TATOLI)—Diretór Komisaun Nasionál Eleisaun (CNE) Manatuto, Paulino Soares, hateten CNE preokupa ho Partidu Libertasaun Povu Maubere (MLPM) ne’ebé ohin kansela sira-nia atividade kampaña iha Manatuto tanba la fó koñesimentu ba CNE Manatuto.

Notísia Relevante: MLPM hakarak investe fábrika latarias iha Manatuto

“To’o agora ami seidauk hetan informasaun hosi partidu ne’ebé atu halo kampaña no ida-ne’e ami konsidera Partidu MLPM la konsidera, tanba la fó koñesimentu bainhira iha mudansa ba kalendáriu kampaña nian ka iha razaun balun,” nia hateten ba Agência Tatoli iha nia knaar fatin Manatuto, segunda ne’e.

Tanba, tuir nia, ekipa CNE Manatuto ho parte Provedória Direitu Umanu no Justisa (PDHJ) ba dala-rua iha fatin kampaña tuir kalendáriu hosi CNE maibé ema ida laiha fatin refere.

“Ida-ne’e ami tau ajenda hodi priexse ba formuláriu no ajusta ba relatóriu, nune’e relata ba nasionál. Loloos ne’e sira fó hatene ba ami katak ohin ami la halo atividade kampaña, tanba ho razaun hanesan ne’e ka iha fatin seluk. Nune’e, ami hatene, se lae ami ba ema laiha. Ida-ne’e sira la konsidera ona ami inklui seguransa sira,” nia hateten.

Tanba ne’e, nia husu ba partidu polítika sira-ne’ebé mak atu mai halo kampaña mak hakarak muda fatin ka oras karik tenke aproxima ho CNE no tenke fó koñesimentu, nune’e ekipa mós hatene no bele monitoriza.

“Ohin ne’e, ami simu de’it informasaun hosi Partidu Unidade Dezenvolvimentu Demokrátiku (PUDD) ne’ebé dehan sei altera fatin hosi salaun Santo António Manatuto ba iha kampu Carlilo Manatuto Vila,” nia hateten.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!