LOSPALOS, 24 abríl 2023 (TATOLI)- Sekretáriu Jerál Partidu Unidade Dezenvolvimentu Demokrátiku ( PUDD), Aleixo de Carvalho Ximenes Monteiro, hateten, PUDD sei tau prioridade dezenvolve setór turizmu komunitáriu iha Postu administrativu Tutuala, Jaco no Postu administrativu Lautém, Suku Com, se povu tau fiar.
“PUUD nia programa prioridade ba Munisípiu Lautém mak hadi’a no dezenvolve setór turizmu komunitáriu iha Tutuala Jaco no fatin turistíka iha suku Com,” Sekretáriu Jerál Partidu PUDD, Aleixo Monteiro ba Militante no Simpatizante sira iha salaun Dom Bosco Lospalos Vila, segunda ne’e.
Nia hateten, turizmu komunitáriu importante hodi reforsa ekonómia Munisípiu Lautém nian, tanba ne’e karik povu Lautém hili PUDD iha eleisaun,PUDD sei fasilita juventude sira hodi halo kooperativa atu tau hamutuk forsa hodi dezenvolve setór turizmu iha Jaco no Com atu nune’e atrai turista internasionál no lokál sira hodi bele mai vizita fatin turizmu komunitáriu hirak ne’e no fó rendimentu ba juventude no povu Lautém.
“PUDD kompremete sei fó kréditu ba grupu juventude no povu Lautém hodi dezenvolve turizmu komunitáriu iha Tutuala Jaco, Com no fatin seluk hodi sai hanesan fatin destinasaun ba turista internasionál no turista lokál sira atu bele fó rendimentu ekonómia sustantável ba komunidade sira iha fatin refere,” nia hateten.
Sekretáriu Jerál, Aleixo Monteiro, reforsa tán katak, PUDD mós sei tulun povu kooperativa sira hodi fasilita trainamentu ba kapasitasaun hodi dezenvolve no garantia sira-nia kooperativa la’o ba oin.
Alende programa rua ne’ebé PUDD mensiona, iha mós programa xave ne’ebé maka PUDD prioritiza se bainhira povu fó fiar hodi kaer ukun maka hanesan: Edukasaun ba Ema hotu, Saúde ba ema hotu, Infraestutura hanesan hadi’a estrada, ponte, eskola, portu, inklui portu Com, aeroportu ho kualidade, Agrikultura, aumenta saláriu ba msnorin sira, hasa’e saláriu ba Polísia Nasionál Timor-Leste (PNTL), Funsionáriu Públiku, Falintil-Forsa Defeza Timor – Leste ( F- FDTL) no hasa’e saláriu minímu ba empregadór sira.
“Atu realiza programa sira ne’e, PUDD husu ba povu Lautém atu vota ba PUDD ho númeru sorteiu 8 hodi ukun Timor – Leste no lori dezenvolvimentu ba povu tomak iha territóriu Timor – Leste,” nia hateten.
Journalista : Camilio de Sousa
Editora : Nelia Borges
