DILI, 24 abríl 2023 (TATOLI) – Adjuntu Sekretáriu Jerál Partidu Repúblikanu (PR), Venáncio Sarmento, hateten PR la konsege halo kampaña ho tipu vizita fahe brosura iha Suku Berleu, Postu Administrativu Lequidoe, Munisípiu Aileu tanba kondisaun estrada.
“Ohin ami la konsege halo kampaña iha área Berleu, Postu Administrativu Lequidoe, tanba ami-nia kordenadór iha Lequidoe kontatu mai katak estrada iha área ne’ebá kotu no ami labele halo ami-nia kampaña iha fatin ne’ebá, tuir oráriu ne’ebé define ona hosi Komisaun Nasionál Eleisaun (CNE)”, Venáncio Sarmento hateten ba Agência TATOLI via telefone, segunda ne’e.
Nia dehan, ho kondisaun estrada PR halo fali kampaña ho tipu vizita fahe brosura iha Suku Maulau, Postu Maubisse no Munisiípiu Ainaro.
“Hafoin ami simu tiha informasaun hosi ami-nia kordenadór katak ami labele halo kampaña iha Lequidoe, tanba kodisaun estrada, ami fila fali mai iha Maulau, hodi kontinua ami-nia atividade kampaña vizita fahe brosura”, nia informa.
Jornalista: Natalino Costa
Editór : Zezito Silva
